काठमाण्डौ । सेयर खरिदका लागि लगानीकर्तालाई कर्जा उपलब्ध गराउने मार्जिन कारोबार सुविधा १४ ब्रोकर कम्पनीले सुरु गरेका छन् । नेपाल स्टक एक्सचेन्ज (नेप्से)को विवरणअनुसार पुराना तथा नयाँ ब्रोकर कम्पनीहरूले यस्तो सुविधा सञ्चालनमा ल्याएका हुन् ।
मार्जिन कारोबारमा लगानीकर्ताले आफ्नो रकमसँगै ब्रोकरबाट प्राप्त कर्जा प्रयोग गरेर योग्य कम्पनीका सेयर खरिद गर्न सक्छन् । यसले लगानीकर्तालाई आफ्नो उपलब्ध पूँजीभन्दा बढी रकमको कारोबार गर्ने अवसर दिन्छ ।
सेवा सुरु गर्ने कम्पनीको सूचीमा नेपाल स्टक हाउसदेखि नासा सेक्युरिटिज, कलश स्टक मार्केट र केबीएल सेक्युरिटिजसम्म छन् ।
नेपाल धितोपत्र बोर्डको ‘मार्जिन कारोबार सुविधा सम्बन्धी निर्देशिका, २०८२’ अनुसार यस्तो सुविधा लिँदा लगानीकर्ताले सेयरको बजार मूल्यको कम्तीमा ३० प्रतिशत रकम प्रारम्भिक मार्जिन राख्नुपर्छ । कारोबार अवधिभर न्यूनतम २० प्रतिशत सम्भार मार्जिन कायम गर्नुपर्ने व्यवस्था छ ।
बजारको अवस्था, ग्राहक र सम्बन्धित सेयरमा निहित जोखिमका आधारमा ब्रोकरले न्यूनतम सीमाभन्दा बढी प्रारम्भिक मार्जिन पनि माग गर्न सक्छन् ।
सेयरको मूल्य घटेर आवश्यक सम्भार मार्जिन कायम हुन नसके ब्रोकरले लगानीकर्तालाई थप मार्जिन जुटाउन सूचना दिन्छन् । यसलाई ‘मार्जिन कल’ भनिन्छ । त्यसपछि पनि आवश्यक मार्जिन कायम नगरिए ब्रोकरले उक्त सुविधाअन्तर्गत खरिद गरिएको सेयर बिक्री गर्न सक्ने व्यवस्था छ ।
निर्देशिकाले ग्राहकसँग गरिने सम्झौतामा प्रारम्भिक तथा सम्भार मार्जिन, मार्जिन कलको प्रक्रिया र सेवाशुल्क वा ब्याजलगायतका विषय स्पष्ट खुलाउनुपर्ने व्यवस्था गरेको छ ।
कर्जाले सेयर खरिद गर्ने क्षमता बढाए पनि मूल्य घट्दा लगानीकर्ताको आफ्नै पूँजीमा पर्ने नोक्सानीको अनुपात बढ्न सक्छ । त्यसैले यस्तो सुविधा लिँदा ब्याज तथा शुल्कको लागतसँगै थप मार्जिन जुटाउन सक्ने क्षमता पनि विचार गर्न आवश्यक हुन्छ ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।
