एनभिडियाका पूर्वप्रमुख कार्यकारी अधिकृत (सीईओ) जेन्सेन हुआङसँग सम्बन्धविच्छेद भए उनकी श्रीमती लोरी हुआङले करिब ७० अर्ब डलर वा त्योभन्दा बढी सम्पत्ति पाउन सक्ने अनुमान गरिएको छ।
जेन्सेनको कुल सम्पत्ति करिब १४५ अर्ब अमेरिकी डलर रहेकाले त्यसको आधा हिसाब गर्दा ७२ अर्ब ५० करोड डलर हुन्छ। तर, लोरीले वास्तविक रूपमा कति रकम पाउँछिन् भन्ने कुरा सम्पत्तिको स्वामित्व र अमेरिकी कानुनी व्यवस्थामा निर्भर हुनेछ।
जेन्सेनले श्रीमतीप्रति बेइमानी गरेको स्वीकार गरेपछि उनीहरूको ४१ वर्ष लामो वैवाहिक सम्बन्धबारे विभिन्न अड्कलबाजी सुरु भएको हो। उनले नोभेम्बर ८ मा कम्पनीका कर्मचारीलाई पठाएको सन्देशमा आफूले श्रीमती र छोराछोरीलाई चोट पुर्याएको भन्दै माफी मागेका थिए। त्यसपछि उनी र अन्य महिलाबिच सम्बन्ध रहेको समाचार सार्वजनिक भएका थिए। नोभेम्बर १२ मा उनले एनभिडियाको सीईओ पदबाट राजीनामा दिएपछि सम्बन्धविच्छेदको चर्चाले थप गति लिएको छ।
यद्यपि, जेन्सेन र लोरीले सम्बन्धविच्छेद गर्ने कुनै आधिकारिक घोषणा गरेका छैनन्। लोरीले पनि यस विषयमा सार्वजनिक प्रतिक्रिया दिएकी छैनन्।
फोर्ब्स र ब्लुमबर्गका सम्पत्ति मूल्यांकनअनुसार जेन्सेनको कुल सम्पत्ति करिब १४५ अर्ब डलर रहेको छ। यसको आधा रकम करिब ७२ अर्ब ५० करोड डलर हुन्छ। सम्बन्धविच्छेद भएमा लोरीले यति ठुलो रकम पाउन सक्ने सम्भावना रहेको विभिन्न अन्तर्राष्ट्रिय सञ्चारमाध्यमले उल्लेख गरेका छन्।
अमेरिकाको क्यालिफोर्निया राज्यमा विवाहपछि आर्जन गरिएको सम्पत्ति सामान्यतया दम्पतीको साझा सम्पत्ति मानिन्छ। सम्बन्धविच्छेद हुँदा यस्तो सम्पत्ति बराबरी बाँड्ने कानुनी व्यवस्था छ। जेन्सेन र लोरी क्यालिफोर्नियामै बस्दै आएका छन्। उनीहरूको विवाह सन् १९८५ मा भएको थियो भने जेन्सेनले सन् १९९३ मा एनभिडियाको सह-स्थापना गरेका थिए।
यस हिसाबले एनभिडियाको विकाससँगै विवाहपछि आर्जन गरिएको शेयर तथा त्यसबाट प्राप्त सम्पत्तिको बाँडफाँट महत्त्वपूर्ण हुन सक्छ। तर, जेन्सेनको कुल सम्पत्तिको आधा नै लोरीले पाउँछिन् भन्ने निश्चित छैन। विवाहअघि आर्जन गरिएको सम्पत्ति, उपहार, पैतृक सम्पत्ति र छुट्टै स्वामित्वमा रहेका सम्पत्तिमा फरक नियम लागू हुन सक्छ।
फर्च्युनका अनुसार जेन्सेन र लोरी तीन वटा पारिवारिक ट्रस्टका सह-ट्रस्टी हुन्। ती ट्रस्टमा मार्च २०२६ सम्म एनभिडियाका करिब ६६ करोड ९० लाख कित्ता शेयर थिए। सेप्टेम्बरमा सार्वजनिक भएको अमेरिकी धितोपत्र तथा विनिमय आयोग (एसईसी) को विवरणअनुसार ती ट्रस्टमा प्रत्यक्ष रहेको शेयर संख्या करिब ६० करोड ८० लाख कित्ता थियो। यसबाहेक, उनीहरूको पारिवारिक ट्रस्टको स्वामित्वमा रहेका कम्पनीमार्फत थप सात करोड ३३ लाख कित्ता शेयर राखिएको छ।
एनभिडियाका अनुसार ती शेयरको मतदान र लगानीसम्बन्धी अधिकारमा दुवैको संयुक्त नियन्त्रण हुन सक्छ। तर, ट्रस्टमा शेयर हुनु वा त्यसको नियन्त्रणमा सहभागी हुनु मात्रै व्यक्तिगत स्वामित्व प्रमाणित गर्ने आधार होइन। त्यसैले सम्बन्धविच्छेद भएमा शेयरको वास्तविक स्वामित्व र ट्रस्टको संरचना महत्त्वपूर्ण हुनेछ।
लोरी परिवारको परोपकारी संस्था ‘जेन-हसुन एन्ड लोरी हुआङ फाउन्डेसन’की अध्यक्षसमेत हुन्। उक्त संस्थाले सन् २०२४ को अन्त्यसम्म करिब नौ अर्ब २० करोड डलर बराबरको सम्पत्ति रहेको विवरण सार्वजनिक गरेको थियो। तर, फाउन्डेसनको सम्पत्ति लोरीको व्यक्तिगत सम्पत्ति मानिँदैन।
जेन्सेन र लोरीको भेट सन् १९८० को दशकमा अमेरिकाको ओरेगन स्टेट युनिभर्सिटीमा भएको थियो। उनीहरू विद्युत् इन्जिनियरिङको कक्षामा प्रयोगशालाका सहपाठी थिए। सन् १९८५ मा विवाह गरेका उनीहरूले एनभिडिया स्थापना गर्नुअघि नै वैवाहिक जीवन सुरु गरिसकेका थिए।
जेन्सेनले सन् २०२३ मा द न्यूयोर्करलाई दिएको अन्तर्वार्तामा आफूहरू सिलिकन भ्यालीमा काम गर्न जाँदा लोरीले आफूभन्दा बढी कमाउने गरेको बताएका थिए। पछि लोरीले दुई छोराछोरीको हेरचाह गर्न जागिर छाडेकी थिइन्।
लोरीले परिवारको परोपकारी संस्था सञ्चालन गर्नुका साथै विभिन्न विश्वविद्यालय र गैरनाफामूलक संस्थालाई सहयोग गर्दै आएकी छन्। दम्पतीले ओरेगन स्टेट युनिभर्सिटीमा अनुसन्धान केन्द्र निर्माण गर्न पाँच करोड डलर सहयोग गरेका थिए। उक्त केन्द्रको नाम दुवैको नामबाट राखिएको छ।
यदि जेन्सेन र लोरीबिच सम्बन्धविच्छेद भयो र लोरीले करिब ७२ अर्ब ५० करोड डलर बराबरको सम्पत्ति प्राप्त गरिन् भने यो विश्वकै महँगो सम्बन्धविच्छेदमध्ये एक हुन सक्छ।
यसअघि अमेजनका संस्थापक जेफ बेजोससँग सम्बन्धविच्छेद हुँदा उनकी पूर्वश्रीमती म्याकेन्जी स्कटले करिब ३६ अर्ब डलर बराबरको अमेजन शेयर प्राप्त गरेकी थिइन्। लोरीले पनि अनुमान गरिएअनुसार सम्पत्ति प्राप्त गरेमा उक्त रकम स्कटले पाएको सम्पत्तिभन्दा निकै बढी हुनेछ।
तर, जेन्सेन र लोरीले विवाहअघि वा विवाहपछि सम्पत्ति बाँडफाँटसम्बन्धी कुनै सम्झौता गरेका छन् कि छैनन् भन्ने सार्वजनिक भएको छैन। उनीहरूको सम्पत्तिको वास्तविक स्वामित्व, ट्रस्टको संरचना र कानुनी सम्झौताले अन्तिम निर्णय निर्धारण गर्नेछ। अन्तर्राष्ट्रिय सञ्चारमाध्यमको सहयोगमा
प्रकाशित: २९ कार्तिक २०८३ १४:२१ आइतबार
(169).png)
.png)
.png)