अप्पर तामाकोशीको नाफा १.१२ प्रतिशत घट्यो, विद्युत बिक्री आम्दानी बढ्यो

काठमाडौं । अप्पर तामाकोशी जलविद्युत कम्पनीले चालु आर्थिक वर्ष २०८३/८४ को पहिलो त्रैमासमा १ अर्ब ६५ करोड ५९ लाख रुपैयाँ खुद नाफा कमाएको छ । यो गत आर्थिक वर्षको सोही अवधिको तुलनामा १.१२ प्रतिशत कम हो । गत वर्ष कम्पनीले १ अर्ब ६७ करोड ४६ लाख रुपैयाँ नाफा कमाएको थियो ।

कम्पनीको विद्युत बिक्री आम्दानी भने २.२८ प्रतिशतले बढेर ३ अर्ब ९४ करोड २८ लाख रुपैयाँ पुगेको छ । गत वर्षको सोही अवधिमा यस्तो आम्दानी ३ अर्ब ८५ करोड ५१ लाख रुपैयाँ थियो । सञ्चालन नाफा पनि बढेर २ अर्ब ८० करोड १० लाख रुपैयाँ पुगेको छ ।

यद्यपि, वित्तीय खर्च १ अर्ब १४ करोड ७४ लाख रुपैयाँ पुगेपछि खुद नाफामा सामान्य गिरावट आएको हो । गत वर्ष यस्तो खर्च १ अर्ब ४ करोड ५९ लाख रुपैयाँ थियो ।

२१ अर्ब १८ करोड रुपैयाँ चुक्ता पुँजी रहेको कम्पनीको सञ्चित नोक्सानी १० अर्ब ९७ करोड ९४ लाख रुपैयाँ छ । कम्पनीको प्रतिसेयर आम्दानी ७ रुपैयाँ ८२ पैसा र प्रतिसेयर नेटवर्थ ५२ रुपैयाँ ३० पैसा रहेको छ ।

४५६ मेगावाट क्षमताको आयोजना पूर्ण रूपमा सञ्चालनमा रहेको कम्पनीले जनाएको छ । पहिरोबाट क्षति पुगेका संरचनाको अधिकांश मर्मत तथा रोकथामका काम सम्पन्न भइसकेका छन् । दीर्घकालीन ऋणको ब्याजदर घटाएर स्थिर बनाइएकाले आगामी दिनमा वित्तीय खर्च कम भई अवस्था सुधार हुने कम्पनीको अपेक्षा छ ।

यता, २०८१ असोज १२ गतेको पहिरोबाट संरचना तथा विद्युत बिक्रीमा भएको क्षतिको बीमा दाबी रकम भने अझै प्राप्त हुन बाँकी रहेको कम्पनीले जनाएको छ ।

अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।