असलंकाले ४३ बलमा ६४ रन बनाएपछि विराटनगरले २० ओभरमा चार विकेट गुमाउँदै १६६ रन जोड्यो।
चारिथ असलंकाको अर्धशतकमा विराटनगर किंग्सले नेपाल प्रिमियर लिग क्रिकेटको शनिबार लुम्बिनी लायन्सलाई १ सय ६७ रनको लक्ष्य दिएको छ । असलंकाले ४३ बलमा ६४ रन बनाएपछि टस हारेर ब्याटिङमा आएको विराटनगरले निर्धारित २० ओभरमा ४ विकेट गुमाई १ सय ६६ रन बनायो ।
लोकेश बम १७ बल खेली २ चौका प्रहार गरी १५ रन बनाई पाँचौं ओभरमा आउट भए । त्यसपछि असलंकाले इमरान शेख र शुभम् रन्जनेसँग मिलेर विराटनगरलाई राम्रो योगफलमा उभ्याएका हुन् । इमरान २९ बल खेली १ छक्का प्रहार गर्दै २४ रनमा आउट भए ।
असलंकाले आफूले पाएका दुईवटा जीवनदानको पूरा फाइदा उठाए । उनी २२ रनमा हुँदा रुबेन ट्रम्पलमनले लङ अनमा र ४७ रनमा हुँदा आसिफ शेखले लङ अफमा क्याच छाडेका थिए । असलंकाले आफ्नो इनिङ्समा १ चौका र ६ छक्का प्रहार गरे ।
रन्जने २४ बल खेली ४ चौका प्रहार गरी ३१ रनमा अविजित रहे । सेहन जयसुर्या १ र इसुरु उडाना ६ रनमा अविजित रहे । लुम्बिनीका किशोर महतोले ४ ओभरमा २४ रन खर्चेर २ तथा ट्रम्पलमन र अभिशेष गौतमले १–१ विकेट लिए । ट्रम्पलमनले त्यसका लागि ४ ओभरमा ५२ रन खर्चन पुगेका थिए । अभिशेषले ३ ओभरमा १५ रनमात्र खर्चेका थिए ।
लुम्बिनी यसअघि नै प्लेअफमा निश्चित भइसकेको छ र यस खेल जितेमा शीर्ष टोली बन्दै क्वालिफायरमा पुग्ने छ । विराटनगरलाई प्लेअफमा पुग्ने आशालाई जीवितै राख्न यस खेल जित्नै पर्ने दबाब रहेको छ । लुम्बिनी ९ अंकसहित दोस्रो स्थानमा छ ।
विराटनगरमाथि विजय हात पारेमा १० अंकमा रहेको सुदूरपश्चिम रोयल्सलाई उछिन्दै लुम्बिनी शीर्ष स्थानमा निश्चित हुनेछ । विराटनगरले जित हात पारेमा ८ अंक पुग्ने छ र चौथो स्थानमा उक्लने छ ।
विराटनगरको प्लेअफमा पुग्ने आशा चितवन राइनोज र कर्णाली याक्सबीचको खेलमा अड्किएको छ । चितवनले कर्णालीलाई पराजित गरेमा विराटनगर प्लेअफ दौडबाट बाहिरिने छ ।
विनोद पाण्डे कान्तिपुरका खेलकुद ब्यूरो प्रमुख हुन् ।
