सम्मान प्राप्त गरेपछि सामाजिक सञ्जालमार्फत आफ्नो खुसी व्यक्त गर्दै शाहीले यो सम्मान व्यक्तिगत उपलब्धिभन्दा पनि आफूलाई साथ, सहयोग र प्रेरणा दिने परिवार, आफन्त, साथीभाइ तथा समग्र नेपाली समुदायको साझा सम्मान भएको बताएका छन् ।
कञ्चनपुर — अस्ट्रेलियामा नेपाली समुदायका सदस्यहरूलाई सहयोग तथा सामाजिक सेवामा सक्रिय कञ्चनपुरको बेलौरीका युवा किशोर शाही ‘Newcastle Volunteer Service Award 2026’ बाट सम्मानित भएका छन् ।
अस्ट्रेलियाको न्यूक्यासलमा आयोजित विशेष समारोहमा न्यूक्यासल क्षेत्रकी संघीय सांसद तथा अस्ट्रेलियाको प्रतिनिधिसभाकी उपसभामुख Sharon Claydon MP ले शाहीलाई उक्त सम्मान प्रदान गरेकी हुन् । स्वयंसेवा, सामाजिक उत्तरदायित्व र समुदायप्रतिको योगदानको कदरस्वरूप उनलाई सम्मान गरिएको जनाइएको छ ।
सन् २०१७ मा अस्ट्रेलिया पुगेदेखि नै शाही नेपाली विद्यार्थी तथा समुदायका सदस्यहरूलाई आवश्यक सहयोग र मार्गदर्शन उपलब्ध गराउँदै आएका छन् । विशेषगरी नयाँ आउने नेपालीहरूलाई आवास खोज्न, रोजगारीसम्बन्धी जानकारी लिन तथा विभिन्न अप्ठ्यारा परिस्थितिमा सहयोग जुटाउन उनी सक्रिय रहँदै आएका हुन् ।
‘Nepalese in Newcastle’ नामक फेसबुक ग्रुपमार्फत नेपालीहरूलाई एकीकृत गर्ने, विद्यार्थी तथा स्थानीय क्लबहरूलाई सहयोग गर्ने र सार्वजनिक यातायात अवरुद्ध भएका बेला कारपुलिङ समन्वय गर्नेजस्ता सामाजिक काममा समेत उनको योगदान छ ।
शाहीको सामाजिक सेवा अस्ट्रेलियामा मात्र सीमित छैन । नेपालमा पनि आर्थिक रूपमा कमजोर विद्यार्थीहरूलाई लत्ताकपडा, जुत्ता तथा आधारभूत आवश्यकता पूरा गर्न सहयोग गर्दै आएका छन् । उपचारका लागि आर्थिक कठिनाइ भोगिरहेका व्यक्ति तथा समुदायलाई समेत आफ्नो क्षमताअनुसार सहयोग गर्दै आएको उनले बताएका छन् ।
सम्मान प्राप्त गरेपछि सामाजिक सञ्जालमार्फत आफ्नो खुसी व्यक्त गर्दै शाहीले यो सम्मान व्यक्तिगत उपलब्धिभन्दा पनि आफूलाई साथ, सहयोग र प्रेरणा दिने परिवार, आफन्त, साथीभाइ तथा समग्र नेपाली समुदायको साझा सम्मान भएको बताएका छन् । उनले विशेषगरी आफ्ना आमाबुबा, श्रीमती, गुरुहरू, दिदीबहिनीहरू तथा ‘Nepalese in Newcastle’ का सम्पूर्ण एडमिन टिमप्रति आभार व्यक्त गरेका छन् । साथै, यो सम्मानले आफ्नो हौसला बढाउनुका साथै सामाजिक सेवाप्रतिको जिम्मेवारीसमेत थपिएको उल्लेख गरेका छन् ।
‘म ठूलो मान्छे बन्न चाहन्नँ, केवल कसैको अप्ठ्यारो समयमा काम लाग्ने असल मान्छे बन्न चाहन्छु,’ शाहीले आफ्नो अभिव्यक्तिमा भनेका छन् । विदेशमा रहेर पनि नेपाली समुदायको सुखदुःखमा साथ दिने र जन्मभूमिप्रतिको सामाजिक उत्तरदायित्व निर्वाह गर्ने शाहीको योगदानले नेपाली युवाहरूमा सकारात्मक प्रेरणा थपेको उनका शुभचिन्तकहरूको भनाइ छ ।
हरिश्चन्द्र बाग कान्तिपुर टेलिभिजनका कञ्चनपुर संवाददाता हुन्।
