गाजाको अस्पतालमा इजरायली हवाई आक्रमण, कम्तीमा ६ जनाको मृत्यु

गाजाको दक्षिणी क्षेत्र खान युनिसस्थित नासेर मेडिकल कम्प्लेक्सको शल्यक्रिया विभागमा इजरायलले गरेको हवाई आक्रमणमा कम्तीमा छ जनाको मृत्यु भएको छ भने २० जनाभन्दा बढी घाइते भएका छन्। प्यालेस्टिनी सुरक्षा तथा स्वास्थ्य स्रोतका अनुसार बिहिबार इजरायली विमानले अस्पताल परिसरको शल्यक्रिया विभाग रहेको दोस्रो तलामा कम्तीमा एउटा क्षेप्यास्त्र प्रहार गरेको थियो। आक्रमणबाट शल्यक्रिया विभागसहित आसपासका संरचनामा ठूलो क्षति पुगेको छ। मेडिकल कम्प्लेक्सका निर्देशक आतिफ अल–हौतले आक्रमणले भवनमा प्रत्यक्ष क्षति पुर्‍याएको र सघन उपचार कक्ष तथा शल्यक्रिया कक्षहरूमा समेत गम्भीर असर परेको बताउनुभयो।

आक्रमणपछि आगो नियन्त्रणमा लिन र घाइते तथा प्रभावितको उद्धार गर्न नागरिक सुरक्षा टोली, उद्धारकर्मी र स्वास्थ्यकर्मी घटनास्थल पुगेका थिए। गाजाको नागरिक सुरक्षा निकायका प्रवक्ता महमुद बासलले उद्धार टोलीले घटनास्थलबाट छ जनाको शव निकालेको र २० जनाभन्दा बढी घाइतेलाई अस्पतालबाट बाहिर निकालिएको बताउनुभयो। घाइतेमध्ये केहीको अवस्था गम्भीर रहेको उहाँले जानकारी दिनुभयो। गाजाको स्वास्थ्य अधिकारीहरूले जारी गरेको विज्ञप्तिअनुसार मृत्यु हुनेमा स्वास्थ्यकर्मी, बिरामी र उनीहरूका कुरुवा रहेका छन्। स्वास्थ्य अधिकारीहरूले अस्पतालमाथिको आक्रमणलाई स्वास्थ्य प्रणालीमाथिको गम्भीर प्रहार र अन्तर्राष्ट्रिय कानुन तथा सन्धिको खुला उल्लङ्घन भन्दै निन्दा गरेका छन्। उनीहरूले अस्पताल, स्वास्थ्यकर्मी र बिरामीको सुरक्षा सुनिश्चित गर्न, यस्ता आक्रमण रोक्न तथा जिम्मेवार पक्षलाई जवाफदेही बनाउन अन्तर्राष्ट्रिय समुदाय, संयुक्त राष्ट्रसङ्घीय निकाय र मानवअधिकार संस्थाहरूलाई तत्काल हस्तक्षेप गर्न आग्रह गरेका छन्।

Read full story at source ( emountaintv.com )