खाडी राष्ट्रहरूको आग्रहमा इरानमाथि थप आ’क्रमण रोकेँ : ट्रम्प

अमेरिकी राष्ट्रपति डोनाल्ड ट्रम्पले साउदी अरेबिया, कतारसहितका खाडी राष्ट्रहरूले इरानमाथि थप ठूला सैन्य आक्रमण नगर्न आग्रह गरेको बताएका छन्।

उनले तीन दिनभित्रै इरानको ऊर्जा पूर्वाधार, पुल तथा उत्पादन क्षमतालाई ध्वस्त पार्न सक्ने दाबीसमेत गरेका छन्।

ह्वाइट हाउसमा स्टीफन ए स्मिथसँगको अन्तर्वार्तामा ट्रम्पले अमेरिका चाहेको खण्डमा युद्ध तत्काल अन्त्य गर्न सक्ने बताए। तर, क्षेत्रीय सहयोगी राष्ट्रहरूको आग्रहका कारण हाल इरानमाथि आर्थिक तथा सैन्य दबाब कायम राख्ने नीति अपनाइएको उनको भनाइ छ।

ट्रम्पका अनुसार साउदी अरेबियाले केही समयका लागि अहिलेको अवस्था कायम राख्न आग्रह गरेको थियो। कतार, कुवेत, संयुक्त अरब इमिरेट्स र बहराइनले पनि हालको रणनीतिलाई निरन्तरता दिन समर्थन गरेको उनले बताए।

‘मलाई यसमा सहमत हुने वा नहुनेबारे निश्चित छैन,’ ट्रम्पले भने। खाडी राष्ट्रहरूको आग्रह नभएको भए इरानमाथि थप आक्रमण गर्ने थिए कि भन्ने प्रश्नमा उनले ‘हो, म गर्थें’ भन्दै जवाफ दिएका थिए।

ट्रम्पले अमेरिकी सेनाले इरानको ऊर्जा पूर्वाधार र पुलहरूलाई अहिलेसम्म ठूलो क्षति नपुर्‍याएको दाबी गरे। आवश्यक परेको अवस्थामा तीन दिनभित्र इरानको ऊर्जा आपूर्ति, पुल र उत्पादन क्षमतामा व्यापक क्षति पुर्‍याउन सकिने उनको भनाइ थियो।

यसैबीच, युद्धका कारण पेट्रोलियम पदार्थको मूल्य बढ्दा मध्यावधि निर्वाचनमा रिपब्लिकन पार्टीलाई राजनीतिक क्षति पुगेको ट्रम्पले स्वीकार गरेका छन्। यद्यपि, इरानमाथि सैन्य कारबाही गर्ने आफ्नो निर्णयको उनले बचाउ गरेका छन्।

यस्तै, उपराष्ट्रपति जेडी भान्सले इरानका सुरक्षा प्रमुखसँग प्रत्यक्ष वार्ता गर्ने सम्भावनाबारे खबर सार्वजनिक भइरहेका बेला ट्रम्पले इरानविरुद्ध थप सैन्य कारबाही गर्न आफू पछि नहट्ने संकेत गरेका छन्। आवश्यक परे तत्काल नयाँ आक्रमण गर्न सकिने उनको चेतावनी छ।

प्रकाशित: २७ कार्तिक २०८३ ०७:१७ शुक्रबार