नेपाल प्रिमियर लिग (एनपीएल) अन्तर्गत सोमबार सम्पन्न ‘डे-नाइट’ खेलमा काठमाडौं गोर्खाजले चितवन राइनोजलाई १० रनले पराजित गर्दै रोमाञ्चक जित हात पारेको छ।
त्रिवि अन्तर्राष्ट्रिय क्रिकेट मैदानमा काठमाडौंले प्रस्तुत गरेको १८१ रनको लक्ष्य पछ्याएको चितवन निर्धारित २० ओभरमा ७ विकेट गुमाएर १७० रनमै रोकियो।
चितवनका लागि रवि बोपाराले अर्धशतकीय इनिङ्स खेले पनि टोलीलाई जित दिलाउन सकेनन्।
बोपाराले ३५ बलमा २ चौका र ३ छक्का प्रहार गर्दै सर्वाधिक ५५ रन बनाए। उनले ३४ बलमा अर्धशतक पूरा गरेका थिए। जिततर्फ अग्रसर रहेको अवस्थामा १९.२ ओभरमा बोपारालाई कप्तान करण केसीले क्याच आउट गराएपछि खेल काठमाडौंको पक्षमा मोडिएको थियो।
ड्यान मौसलेले ३२ बलमा २९ रन जोडे। यसअघि ओपनर कामिल मिशाराले ११ बलमा १ चौका र ३ छक्कासहित विष्फोटक २८ रन र अर्जुन साउदले २१ बलमा २३ रन बनाएका थिए।
अन्य ब्याटरमा कुशल मल्ल १३, कप्तान सिकन्दर राजा २ र विवेक यादव ४ रनमा आउट भए। कमल ऐरी ४ र रिजन ढकाल १ रनमा अविजित रहे। चितवनले अतिरिक्त १० रन पाएको थियो।
काठमाडौं गोर्खाजका लागि बलिङतर्फ सहन अराचिगेले ४ ओभरमा ३७ रन खर्चेर २ विकेट लिए। गणेश गौतमले ३ ओभरमा मात्र १६ रन, सन्तोष यादवले ३ ओभरमा १९ रन, जहान्दाद खानले ४ ओभरमा ३७ रन र कप्तान करण केसीले ३.५ ओभरमा ४२ रन दिएर समान १-१ विकेट हात पारे।
यसअघि टस हारेर पहिले ब्याटिङ गरेको काठमाडौंले २० ओभरमा ८ विकेट गुमाउँदै १८० रन बनाएको थियो। काठमाडौंका लागि अलराउन्डर रसिद खानले ३० बलमा २ चौका र ४ छक्कासहित ५२ रनको विष्फोटक इनिङ्स खेलेका थिए।
सहन अराचिगेले ३३ रन, विलियम बोसिस्टोले २७ रन र अन्त्यतिर कप्तान करण केसीले ७ बलमा ३ छक्कासहित २० रनको योगदान दिएका थिए।
चितवनका रिजन ढकालले ४ ओभरमा १४ रन खर्चेर ३ विकेट लिएका थिए भने कमल ऐरी र कप्तान सिकन्दर राजाले समान २-२ विकेट लिएका थिए।
प्रकाशित: २३ कार्तिक २०८३ २०:४२ सोमबार
