ओपनर युभराज सम्राले नेपाल प्रिमियर लिग (एनपीएल) सिजन ३ को पहिलो शतक प्रहार गरेपछि पोखरा एभेन्जर्सले कर्णाली याक्ससामु २१८ रनको विशाल लक्ष्य प्रस्तुत गरेको छ।
कीर्तिपुरस्थित त्रिवि क्रिकेट मैदानमा जारी प्रतियोगिताको १९ औं खेलमा टस जितेर पहिले ब्याटिङ गरेको पोखराले चालू सिजनमै पहिलो पटक २०० रनको आँकडा पार गर्यो। पोखराले निर्धारित २० ओभरमा ३ विकेट गुमाउँदै २१७ रनको विशाल योगफल खडा गरेको हो।
जारी सिजनकै पहिलो शतक बनाउने क्रममा युभराजले मात्र ४८ बलमा १० चौका र ६ छक्कासहित १०२ रनको विष्फोटक इनिङ्स खेले। उनले २३ बलमै अर्धशतक र ४५ बलमा आफ्नो शतक पूरा गरेका थिए।
युभराजलाई तेस्रो नम्बरमा आएका कुशल भुर्तेलले उत्कृष्ट साथ दिए। भुर्तेलले ३९ बलमा ७ छक्काको मद्दतमा ६२ रनको आक्रामक अर्धशतकीय इनिङ्स खेले। उनले २८ बलमा अर्धशतक बनाएका थिए। दोस्रो विकेटका लागि युभराज र भुर्तेलबीच १३६ रनको महत्वपूर्ण साझेदारी भएको थियो।
अन्त्यतिर कप्तान चामिका करुणारत्नेले मात्र ११ बलमा ३ चौका र ३ छक्का प्रहार गर्दै अविजित ३५ रन जोडे। सन्नी बिक ३ रनमा अविजित रहँदा ओपनर मेहदी हसन ५ रन बनाएर आउट भए। पोखराले अतिरिक्त १० रन पाएको थियो।
पोखराले पावरप्लेको ६ ओभरमा १ विकेट गुमाएर ४२ रन जोडेको थियो। त्यसपछि टोलीले ७ ओभरमा ५० रन, ११ ओभरमा १०० रन, १३.३ ओभरमा १५० रन र १८.४ ओभरमा २०० रन पूरा गर्यो।
कर्णाली याक्सका लागि कप्तान सोमपाल कामीले कसिलो बलिङ गर्दै ४ ओभरमा २४ रन खर्चेर २ विकेट लिए। मार्क वाटले ४ ओभरमा ३४ रन दिएर १ विकेट हात पारे।
कर्णालीका अन्य बलरहरू नन्दन यादव (४ ओभरमा ४१ रन), पवन सर्राफ (३ ओभरमा २६ रन), गुलशन झा (२ ओभरमा ३० रन), जिशान आलम (१ ओभरमा २४ रन), सूर्य तामाङ (१ ओभरमा २० रन) र युवराज खत्री (१ ओभरमा १५ रन) भने विकेटविहीन रहे।
प्रकाशित: २३ कार्तिक २०८३ १४:०९ सोमबार
