लुम्बिनी १० खेलमा अपराजित रहेको छ । गत सिजन उपाधि जित्ने क्रममा लुम्बिनीले ६ खेल जितेको थियो । यस पटक टोलीको चितवन राइनोजसँगको खेलमा वर्षाका कारण रद्द भएको थियो ।
काठमाडौँ — लुम्बिनी लायन्सले नेपाल प्रिमियर लिग क्रिकेटमा शीर्ष स्थानलाई मजबुत बनाएको छ । ‘च्याम्पियन क्ल्यास’ मा गत सिजनको विजेता लुम्बिनीले बिहीबार पहिलो सिजनको विजेता जनकपुर बोल्ट्सलाई १६ रनले पराजित गर्यो ।
१ सय ५० रनको लक्ष्य लिएर आएको जनकपुरले त्रिवि अन्तर्राष्ट्रिय क्रिकेट मैदान कीर्तिपुरमा ८ विकेट गुमाई १ सय ३३ रनमात्र बनाउन सक्यो । ४ खेलमा तेस्रो विजय हात पारेपछि लुम्बिनीको १० अंक पुगेको छ र अन्य टोलीभन्दा ३ अंक बढीको अग्रता बनाएको छ । जनकपुरको ५ खेलमा यो तेस्रो हार हो ।
लुम्बिनी १० खेलमा अपराजित रहेको छ । गत सिजन उपाधि जित्ने क्रममा लुम्बिनीले ६ खेल जितेको थियो । यस पटक टोलीको चितवन राइनोजसँगको खेलमा वर्षाका कारण रद्द भएको थियो ।
जनकपुरले १० ओभरमा ५५ रनमात्र बनाउन सकेर ५ विकेट गुमाइसकेपछि खेलमा पछाडि परेको थियो । प्रतियोगितामा पहिलो खेल खेलिरहेका पर्भेज हुसैन इमोन १ रनमा आउट भए । तृतराज दास र सैफ हसनले दोस्रो विकेटमा ३६ रनको साझेदारी गरे । तर त्यसपछि जनकपुरले १४ रनको अन्तरमा अर्को ५ विकेट गुमाएको थियो ।
तृतलाई १८ रनमा डीआरसी शर्टले बोल्ड गरे । १८ बल नै खेलेका तृतले १ चौका प्रहार गरे । हुसैनले जनकपुरबाट २८ रन बनाए । उनले २५ बल खेली ४ चौका प्रहार गरे । विशाल सुस्लिङ ४, अनिल साह १, जिम्मी निसम ९ रन र अभिषेक तिवारी शून्यमा आउट भए ।
कप्तान हरमित सिंह र आदित्य महताले आठौं विकेटमा ४३ रनको साझेदारी गरे । शेर मल्लले हरमितलाई बोल्ड गरी यो साझेदारी तोडे । हरमितले २० बल खेली ३ छक्का प्रहार गरी ३३ रन बनाए । आदित्य २३ बल खेली ३० रनमा अविजित रहे । उनले ४ छक्का प्रहार गरे ।
लुम्बिनीबाट शर्टले ४ ओभरमा २३ रन खर्चेर ३, तिलकले २ ओभरमा र शेरले ४ ओभरमा २९ रन खर्चेर २–२ विकेट लिए । रुबेन ट्रम्पलमनको नाममा एक विकेट रह्यो ।
यसअघि टस हारेर ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाई १ सय ४९ रन बनाएको थियो । यसअघि शट खेलको पहिलो बलमै आउट भए पनि लुम्बिनी चुनौतीपूर्ण स्कोर बनाउन सफल भएको थियो । ललित राजवंशीको पहिलो बलमा शटले राहुललाई क्याच दिन पुगे ।
अर्का ओपनर आसिफ शेख २१ बल खेली २ चौका र १ छक्का प्रहार गरी २१ रन बनाई हरमितको बलमा एलबीडब्लु आउट भए । तर आसिफले ‘डिसिजन रिभ्यु सिस्टम’ लिएनन् । तर टेलिभिजन रिप्लेमा बलले स्टम्प नलागेको देखाएको थियो ।
निरोशन डिकवेलाले २७ रन जोडे । उनले २७ बल नै खेल्दै २ चौका र १ छक्का प्रहार गरे । दिलीप नाथले २५ रन बनाए । उनले १६ बल खेली समान २ चौका र छक्का प्रहार गरे । कप्तान रोहित पौडेलले सर्वाधिक ३८ रन बनाए । उनले ३१ बल खेली ३ चौका र १ छक्का प्रहार गरे ।
जनकपुरले सुरुको १६ ओभर स्पिनर लगाएपछि १७ औं ओभरमा पेसर राहुल यादवलाई ल्याएको थियो । त्यसको अर्को ओभरमा अर्का मध्यमगतिका बलर अभिषेकले रोहितलाई आउट गरे । सामिम हुसैन १३ बलमा १ छक्का प्रहार गरी १३ रन बनाई राहुलको बलमा आउट भए । सन्दीप जोरा ४ बल खेली २ चौका प्रहार गरी ९ र ट्रम्पलमन ८ बल खेली २ छक्का प्रहार गरी १५ रनमा आउट भए ।
जनकपुरबाट अफ स्पिनर सुस्लिङले ४ ओभरमा २१ र राहुलले २ ओभरमा १७ रन खर्चेर २–२ विकेट लिए । हरमितले ४ ओभरमा २५ र ललितले ४ ओभरमा ३१ रन खर्चेर १–१ विकेट लिए ।
विनोद पाण्डे कान्तिपुरका खेलकुद ब्यूरो प्रमुख हुन् ।
