रोल्पाको माडी गाउँपालिका–१ चालाङ भिरमा भएको दुर्घटनमा अर्की महिला गम्भीर घाइते भएकी छन्।
रोल्पा — रोल्पाको माडी गाउँपालिका–१ चालाङ भिरमा अटो दुर्घटना हुँदा एक महिलाको मृत्यु भएको छ भने अर्की महिला गम्भीर घाइते भएकी छन्।
प्रहरीका अनुसार आइतबार बिहान करिब १० बजे घर्तीगाउँबाट पेदिखोलातर्फ जाँदै गरेको नम्बर नखुलेको अटो अनियन्त्रित भई सडकबाट करिब ६ सय मिटर तल खसेको थियो। दुर्घटनामा माडी गाउँपालिका–१ जवाङकी ५४ वर्षीया गौसरा घर्तीमगर र सोही वडाको घोर्नेटीकी ३२ वर्षीया खुमा कुमारी भण्डारी घाइते भएकामा खुमाको मृत्यु भएको हो।
उनीहरूको शरीरका विभिन्न भागमा चोट लागेका दुवै जनाको अवस्था गम्भीर रहेको र बोल्नसमेत नसक्ने अवस्थामा उद्धार गरिएको प्रहरीले जनाएको छ।
उपचारका लागि घर्तीगाउँस्थित स्मृति अस्पतालका क्रममा चिकित्सकले बिहान ११ः३५ बजे खुमा कुमारी भण्डारीलाई मृत घोषणा गरेका थिए। घाइते गौसरा घर्तीमगरको उपचार भइरहेको छ।
प्रहरीका अनुसार अटोमा चालकसहित तीन जना सवार थिए। अटो चालक माडी गाउँपालिका–३ तालाबाङका करिब ४७ वर्षीय कमलसिंह बुढालाई प्रहरीले नियन्त्रणमा लिएको छ। चालकले मादक पदार्थ सेवन नगरेको र उनीसँग सवारी चालक अनुमतिपत्र नभएको प्रारम्भिक विवरणमा उल्लेख छ। घटनाबारे थप अनुसन्धान भइरहेको प्रहरीले जनाएको छ।
काशीराम डाँगी कान्तिपुरका रोल्पा संवाददाता हुन् ।
