बिहीबार रातिदेखि उच्च क्षेत्रमा हिमपात र बस्तीमा वर्षा भएपछि प्रशासनले पर्यटकलाई सुरक्षित स्थानमै बस्न आग्रह गरेको छ।
लमजुङ — चक्रवात ‘अर्णव’ को प्रभावले हिमाली जिल्ला मनाङको उच्च क्षेत्रमा हिमपात भएको छ । बिहीबार रातिदेखि उच्च क्षेत्रमा हिमपात र बस्तीमा सामान्य वर्षा भइरहेको छ ।
मौसम प्रतिकूल बनेपछि पर्यटक र स्थानीयलाई सुरक्षित स्थानमै बस्न र अत्यावश्यक कामबाहेक बाहिर ननिस्कन आग्रह गरिएको छ ।
माथिल्लो मनाङको मनाङ, टंकी मनाङ र खाङ्सारलगायत क्षेत्रमा राति सामान्य हिमपात भए पनि शुक्रबार बिहानसम्म हिउँ पग्लिसकेको स्थानीयले बताएका छन् । बिहानैदेखि बस्ती क्षेत्रमा भने सिमसिम पानी परिरहेको छ ।
मनाङ ङिस्याङ गाउँपालिका अध्यक्ष कान्छा घलेले गाउँबस्तीमा हिमपात नभए पनि उच्च क्षेत्रमा हिउँ परेको बताए । मौसम प्रतिकूल रहेकाले स्थानीय र पर्यटकलाई अत्यावश्यक कामबाहेक बाहिर ननिस्कन अनुरोध गरिएको उनले जानकारी दिए ।
अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय मनाङका प्रमुख ढकबहादुर भुजेलका अनुसार डाँडाकाँडासहित तिलिचो क्षेत्र र थोराङ्ला पासतर्फ गुन्साङ, याकखर्क र लेदर क्षेत्रभन्दा माथि हिमपात भएको छ । मनाङ गाउँमा राति सामान्य हिमपात भए पनि अहिले सामान्य वर्षा भइरहेको उनले बताए ।
मौसमको अवस्था प्रतिकूल भएपछि माथिल्लो मनाङस्थित एक्याप कार्यालयले बिहीबारदेखि पर्यटकको प्रवेश रोकेको छ । बुधबार मात्रै ७० जना पर्यटकको प्रवेश दर्ता भएको थियो । पर्यटकलाई थोराङ्ला पास हुँदै मुक्तिनाथ र मुस्ताङ जाने साथै तिलिचो तालतर्फ जाने अनुमति नदिइएको भुजेलले बताए ।
‘औपचारिक रूपमा पर्यटकलाई जान दिइएको छैन । तर, कतिपयले अटेर गरेर जान सक्छन्,’ उनले भने । उनका अनुसार अहिले मनाङ भ्यालीमा मात्रै करिब चार सय पर्यटक रहेको अनुमान छ ।
प्रमुख जिल्ला अधिकारी मुक्तिप्रसाद खनालले राति १ बजेदेखि मनाङमा वर्षा सुरु भएको र उच्च क्षेत्रमा हिमपात भएको बताए । वर्षासँगै चिसो बढेको छ । सदरमुकाम चामे र आसपासका क्षेत्रमा सिमसिम पानी परिरहेको उनले जानकारी दिए ।
प्रशासनले पर्यटकलाई आफू बसेकै स्थानमा रहन आग्रह गरेको छ । होटल बुकिङ वा अन्य कारणले अर्को स्थानमा जानुपर्ने अवस्था आए सम्बन्धित निकायसँग सम्पर्क गरेर मात्रै आवतजावत गर्न भनिएको खनालले बताए ।
‘जहाँ हुनुहुन्छ, त्यहीँ सुरक्षित भएर बस्न भनेका छौं । बुकिङ गरेको ठाउँमा जानैपर्ने अवस्था भए पनि सम्पर्क गरेर मात्रै जान अनुरोध गरेका छौं,’ उनले भने ।
प्रतिकूल मौसम र सम्भावित जोखिमलाई ध्यानमा राख्दै बेंसीसहर–चामे सडकमा रातिको समयमा सवारीसाधन आवागमन बन्द गरिएको प्रमुख जिल्ला अधिकारी खनालले बताए ।
आश गुरूङ कान्तिपुरका लमजुङ संवाददाता हुन् ।
(176).png)
