नेपाली कांग्रेसले १५औं महाधिवेशनको सन्देश तल्लो तहसम्म पुर्याउन तथा सङ्गठन सुदृढीकरण गर्न मंसिर महिनाभर ‘कांग्रेस तयार छ’ विशेष अभियान सञ्चालन गर्ने भएको छ।
पार्टी केन्द्रीय कार्यालय सानेपामा बिहीबार नवनिर्वाचित पदाधिकारी तथा केन्द्रीय सदस्यहरूको शपथग्रहण समारोहलाई सम्बोधन गर्दै पार्टी सभापति गगनकुमार थापाले यस्तो घोषणा गरेका हुन्।
महाधिवेशनबाट पारित नीतिगत दस्तावेज र निर्णयहरूलाई समुदायस्तरसम्म पुर्याउन यो अभियान चलाउन लागिएको सभापति थापाले बताए।
विगतको समीक्षा र आलोचनाको चरण समाप्त भइसकेकाले अब पार्टी मुलुकका विद्यमान समस्या समाधान गर्ने दिशामा केन्द्रित हुनुपर्ने उनको भनाइ थियो।
‘हामीले महाधिवेशनबाट पारित गरेका विषयहरू मंसिरमा दस्तावेजीकरण गर्छौँ, त्यसलाई समुदायसम्म पुर्याउन ‘कांग्रेस तयार छ’ विशेष अभियान चलाइनेछ,’ सभापति थापाले भने, ‘हामी देशका समस्या समाधान गर्न तयार छौं, विगतको समीक्षा र आलोचनाको चरण सकियो, अब अगाडि बढ्ने हो।’
कांग्रेस प्रतिपक्षीको सशक्त भूमिका निर्वाह गर्न र स्थानीय तहको जिम्मेवारी प्रभावकारी रूपमा वहन गर्न पूर्ण रूपमा तयार रहेको उनले बताए। पार्टीले लिएका यी जिम्मेवारीबारे आम नागरिकलाई सुसूचित गराउनसमेत उनले नेता-कार्यकर्ताहरूलाई निर्देशन दिए।
यसैबीच, सभापति थापाले नवनिर्वाचित पदाधिकारी तथा केन्द्रीय सदस्यहरूलाई टोल र वडाहरूमा पुगेर लम्बेतान सम्मान कार्यक्रम नगर्न निर्देशन दिएका छन्।
‘यहाँ हामीले सम्मान पायौं, जिम्मेवारी लियौं। अब यहाँबाट गएर टोल-टोल र वडा-वडामा सम्मान लिने काम बन्द गरौं,’ उनले भने।
मुलुक ठूलो विपद्को घडीमा रहेकाले राहत र पुनःस्थापनामा ध्यान दिनुपर्ने औंल्याउँदै उनले पार्टी कोषमा रहेको रकमको समेत सही सदुपयोग गर्नुपर्ने बताए।
आसन्न तिहार र छठ पर्वका अवसरमा पार्टीका विभिन्न कमिटीले आयोजना गर्ने चियापान तथा शुभकामना आदानप्रदान कार्यक्रमहरू औपचारिकतामा मात्र सीमित नभई समुदायसँग प्रत्यक्ष जोडिनुपर्ने निर्देशन सभापति थापाले दिएका छन्।
बाँकी कार्ययोजना पार्टी कार्यालयले छिट्टै तय गर्ने उनले जानकारी दिए।
प्रकाशित: १२ कार्तिक २०८३ २१:३६ बिहीबार
