प्रधानमन्त्री वालेन्द्र शाहको आसन्न भारत भ्रमणका क्रममा आयोजना गर्ने गरी निक्कीले प्रस्ताव गरेको ‘भारत-नेपाल सीईओ राउन्डटेबल’ लाई लक्षित गर्दै दुई निकायबीच लगानी बोर्डको कार्यालयमा भेटवार्ता भएको हो ।
काठमाडौँ — नेपालमा भारतीय लगानी भित्र्याउन र द्विपक्षीय आर्थिक सहयोगलाई थप मजबुत बनाउन नेपाल-भारत उद्योग वाणिज्य संघ (निक्की) र लगानी बोर्ड, कार्यालय नेपालबीच छलफल भएको छ ।
प्रधानमन्त्रीको आसन्न भारत भ्रमणका क्रममा आयोजना गर्ने गरी निक्कीले प्रस्ताव गरेको ‘भारत-नेपाल सीईओ राउन्डटेबल’ लाई लक्षित गर्दै दुई निकायबीच लगानी बोर्डको कार्यालयमा भेटवार्ता भएको हो ।
छलफलमा सार्वजनिक तथा निजी क्षेत्रबीचको सहकार्य सुदृढ बनाउने, नेपालमा सञ्चालित सफल भारतीय लगानीलाई उजागर गर्ने र लक्षित बिजनेस-टु-बिजनेस (बीटूबी) सहकार्यमार्फत नयाँ लगानी भित्र्याउने रणनीतिबारे विचार-विमर्श गरिएको छ ।
बैठकमा निक्कीका अध्यक्ष कुणाल कायलले भारतीय व्यावसायिक संस्थाहरूसँग संघको बलियो नेटवर्क रहेको उल्लेख गर्दै नेपालको लगानी सम्भावनालाई अन्तर्राष्ट्रियस्तरमा थप प्रभावकारी रूपमा सञ्चार गर्नुपर्ने बताए । ' नेपालमा स्थापित भइसकेका भारतीय उद्यमहरूको योगदानलाई उजागर गर्दै नयाँ लगानीकर्तालाई आकर्षित गर्न आवश्यक छ,' उनले भने ।
निक्कीका उपाध्यक्ष गौरव टायलले विशिष्टीकृत स्वास्थ्य सेवा, उच्च शिक्षा, यातायात सञ्जाल, लजिस्टिक र पूर्वाधार निर्माणलाई सम्भावित सहकार्यको क्षेत्रका रूपमा औँल्याए । नेपालको विकास प्राथमिकतासँग मेल खाने स्पष्ट आयोजनाहरू पहिचान गरी लगानीकर्तालाई जोड्नुपर्नेमा उनले बताए ।
लगानी बोर्ड, कार्यालयकी प्रमुख कार्यकारी अधिकृत (सीईओ) यांकी उक्यावले निक्कीको पहललाई स्वागत गर्दै लगानी सहजीकरणलाई सरल बनाउन र सरोकारवाला निकायबीच समन्वय बढाउन बोर्ड प्रतिबद्ध रहेको बताइन् । लगानीका अवसरहरूलाई अघि बढाउन निजी क्षेत्रको रचनात्मक सहभागिता र ठोस प्रस्ताव आवश्यक पर्ने उनको भनाइ छ ।
प्रधानमन्त्री शाहको भारत भ्रमणका क्रममा गर्ने गरी निक्कीले प्रस्ताव गरेको ‘सीईओ राउन्डटेबल’ मा केन्द्रित भई ठोस परिणाम ल्याउने गरी एजेन्डा र प्राथमिकता प्राप्त क्षेत्रहरू तय गर्ने सहमति दुवै पक्षबीच भएको छ । भेटमा निक्कीका पूर्वअध्यक्ष सुनिल केसी, उपाध्यक्ष गौरव टायल, प्रतिनिधिहरू साइबल घोष, मार्शल राठौर तथा लगानी बोर्ड, कार्यालयका सहसचिव भुपेन्द्र थापा र वरिष्ठ डिभिजनल इन्जिनियर दीपक मुढभरी लगायत उपस्थित थिए ।
