स्थानीय उत्पादन प्रवर्द्धन र किसानलाई प्रोत्साहित गर्ने उद्देश्यले आयोजकले विजेता तथा उपविजेतालाई नगदको सट्टा अलैँची प्रदान गर्नेछ।
ताप्लेजुङ — जिल्लाको पहिलो आयस्रोतका रूपमा रहेको अलैँचीको प्रवर्द्धन गर्ने उद्देश्यले आयोजित फङ्फङ्देन फुटबल प्रतियोगिता मंसिर २ देखि ६ गतेसम्म हुने भएको छ ।
मिक्वाखोला गाउँपालिका–४ साँवामा हुने प्रतियोगितामा आयोजकसहित आठ टिमको सहभागिता रहनेछ । फङ्फङ्देन झरना पर्यटन विकास समितिद्वारा आयोजित प्रतियोगितामा आयोजकसहित झापा, सुनसरी, मोरङ, धनकुटा, तेह्रथुमलगायतका जिल्लाका क्लबहरू सहभागी हुनेछन् ।
समिति अध्यक्ष विजय साँवा लिम्बूका अनुसार विजेताले ट्रफी, मेडल र प्रमाणपत्रसँगै तीन लाख दुई हजार ८३ रुपैयाँ बराबरको अलैँची प्राप्त गर्नेछन् । उपविजेताले एक लाख ५२ हजार ८३ रुपैयाँ बराबरको अलैँची प्राप्त गर्नेछन् ।
पुरस्कार प्राप्त गर्ने दिनको चलनचल्तीको मूल्यअनुसार अलैँचीका बोरा दिइने साँवाले जानकारी दिए । गत वर्षदेखि प्रतियोगिताका विजेतालाई नगदको सट्टा अलैँची दिन थालिएको हो ।
स्थानीय स्तरमा उत्पादन हुने अलैँचीको प्रचारप्रसार, बजार विस्तार तथा किसानलाई उत्पादनप्रति प्रोत्साहित गर्न यस्तो व्यवस्था गरिएको आयोजकले बताएका छन् ।
यहाँ फुटबल अवधिभर मेलासमेत लाग्ने गरेको छ । मेलामार्फत फङ्फङ्देन झरनाको प्रचारप्रसार गर्ने गरिएको छ । यहाँ आन्तरिक तथा बाह्य पर्यटक आउने गरेका छन् । हरेक दिन स्थानीय कला, संस्कृति प्रस्तुत गरिन्छ ।
मिक्वाखोला गाउँपालिका अध्यक्ष भक्तबहादुर कार्की र उपाध्यक्ष डन्डु शेर्पा लामाका अनुसार यो मेला तथा फुटबलका लागि गाउँपालिकाले सहयोग गर्दै आएको छ ।
पर्यटन, खेलकुद, संस्कृति र स्थानीय उत्पादनलाई एकसाथ जोड्ने भएकाले गाउँपालिकाले महत्त्वका साथ सहयोग गर्दै आएको उपाध्यक्ष डन्डु शेर्पाले जानकारी दिए ।
आनन्द गौतम कान्तिपुरका ताप्लेजुङ संवाददाता हुन् ।
