पहिलो खेलमा करुवा क्रिकेट क्लबले फ्रेन्ड्स ब्वाइज क्रिकेट क्लबलाई ७५ रनले हराउन सफल भयो ।
पाल्पा — ‘पाल्पा च्याम्पियन्स ट्रफी’ जिल्लास्तरीय क्रिकेट लिग प्रतियोगिताअन्तर्गत बुधबार भएका दुई खेलमा करुवा क्रिकेट क्लब र पाल्पाली क्रिकेट प्लेयर्स विजयी भएका छन् ।
जिल्ला क्रिकेट संघ, पाल्पा र दमकडा क्रिकेट क्लबको आयोजनामा भएको प्रतियोगिताअन्तर्गत पहिलो खेलमा करुवा क्रिकेट क्लबले फ्रेन्ड्स ब्वाइज क्रिकेट क्लबलाई ७५ रनले हराउन सफल भएको छ । पहिलो ब्याटिङ रोजेको करुवाले निर्धारित २० ओभरको खेलमा ८ विकेट गुमाएर १ सय ५४ रन जोड्यो । उसका लागि मनिष न्यौपानेले ४८, तेजेन्द्र बीरजंग राणाले ४० र दिनेश बुढा मगरले १४ रन जोडे । अन्य खेलाडीले दोहोरो रन जोड्न सकेनन् भने २१ अतिरिक्त रन पायो । बलिङतर्फ फ्रेन्ड्स ब्वाइजका रोशन नेपालले तीन, दिवस अर्याल र विपीन भट्टराईले दुई/दुई तथा रोशन बस्यालले एक विकेट लिए ।
जवाफी ब्याटिङमा फ्रेन्ड्सले निर्धारित २० ओभरको खेलमा सबै विकेट गुमाएर ७९ रनमै समेटियो । उसका लागि शुभव शाक्यले १५ र विप्लव जीसीले १० रन बटुले । अन्य खेलाडीले दोहोरो रन जोड्न सकेनन् भने अतिरिक्त १७ रन पायो । बलिङतर्फ करुवाका केशव पहराई र दिनेश बुढा मगरले तीन/तीन, निरबहादुर सार्कीले दुई तथा लीला शर्मा र राजन रखालले एक/एक विकेट लिए ।
अर्को खेलमा पाल्पाली क्रिकेट प्लेयर्सले दमकडा क्रिकेट क्लबलाई ९६ रनको विशाल अन्तरले हराएको छ । पहिले ब्याटिङ रोजेको पाल्पालीले निर्धारित २० ओभरको खेलमा ३ विकेटको क्षतिमा १ सय ५४ रन जोडेको थियो । पाल्पालीका लागि आशि लोहनीले १०३ र कुशल ढकालले ४२ रन जोडे । अन्य खेलाडीले दोहोरो रन जोड्न सकेनन् भने पाल्पालीले अतिरिक्त ६ रन बटुल्यो । बलिङतर्फ दमकडाका शुभम भुसाल, अच्युत पाण्डेय र भुवन पाण्डेयले एक/एक विकेट लिए ।
जवाफी ब्याटिङमा दमकडा सबै विकेट गुमाएर १३.३ ओभरमा ५८ रनमै समेटियो । दमकडाका लागि सागर बस्यालले १० रन जोडे । अन्य खेलाडीले दोहोरो अंक जोडेनन् भने अतिरिक्त ११ रन पायो । बलिङतर्फ पाल्पालीका थानेश्वर भट्टराईले ५, लेखनाथ न्यौपानेले दुई तथा दिपेश पाण्डेय, अमृत अर्याल र रुपेश बस्यालले एक/एक विकेट लिए ।
माधव अर्याल कान्तिपुरका पाल्पा संवाददाता हुन् ।
