उनले पोस्टम्याच कन्फ्रेन्समा भने, ‘आजको जितले हाम्रो दशा कटेको छ । हाम्रो प्रत्येक सिजन एक दिन खराब हुन्छ, त्यो दिन सकिएको छ । अबका दिन आजको जस्तो होस् ।’
काठमाडौं — सुदूरपश्चिम रोयल्सका इशान पाण्डेले बुधबार प्राप्त जितले टिमको दशा कटेको भन्दै खुसी जनाएका छन् । उनले पोस्टम्याच कन्फ्रेन्समा भने, ‘आजको जितले हाम्रो दशा कटेको छ । हाम्रो प्रत्येक सिजन एक दिन खराब हुन्छ, त्यो दिन सकिएको छ । अबका दिन आजको जस्तो होस् ।’
इशानले लिग चरणको अबका खेलमा सुदूरपश्चिमको प्रदर्शन राम्रो हुने विश्वास पोखे । दुईपल्टको उपविजेता सुदूरपश्चिमको यो पहिलो जित हो । टोली उद्घाटन खेलमा लुम्बिनी लायन्ससँग ७ विकेटले हारेको थियो । जितले सुदूरपश्चिमको आत्मविश्वास भने बढ्ने छ । लिग चरणमा दुई सिजनमा जस्तै राम्रो प्रदर्शन गर्न टोलीलाई प्रेरित गर्नेछ ।
पोखरा एभेन्जर्स लगातार तेस्रो सिजन पनि आफ्नो पहिलो खेलमा पराजित रह्यो । पोखरा अहिलेसम्म लिग चरण काट्न असफल एकमात्र टिम रहेको छ । यो हारले यसपालि पनि टोलीमाथि दबाब बढाउने निश्चित छ ।
पोखराका अर्जुन घर्तीले टिमको ब्याटिङ केही खराब भएको बताए । उनले भने, ‘मेरो जिम्मेवारी राम्रो खेल्ने हो, मैले त्यसलाई पूरा गर्नेछु ।’ अर्जुनले टोलीका लागि सर्वाधिक अविजित ४० रन बनाएका थिए ।
सुदूरपश्चिमको जितमा नायक भने कप्तान दीपेन्द्रसिंह ऐरी रहे । अर्धशतक बनाएका उनी नै प्लेयर अफ द म्याच भएका थिए ।
