अमेरिकी राष्ट्रपति डोनाल्ड ट्रम्पले ब्राजिलको राष्ट्रपति चुनावमा अनियमितता भएको आशंका व्यक्त गरेका छन्।
तर, पराजित उम्मेदवार फ्लाभियो बोल्सोनारोको लिबरल पार्टीले भने राष्ट्रपति लुइज इनासियो लुला दा सिल्भाको जित स्वीकार गरेको छ।
पार्टी अध्यक्ष भाल्डेमार कोस्टा नेटोले सोमबार विज्ञप्ति जारी गर्दै निर्वाचन अदालतले घोषणा गरेको नतिजा स्वीकार गरेको बताएका हुन्। यद्यपि, चुनावका क्रममा उठेका प्रश्नको स्पष्ट जवाफ आउनुपर्ने उनको भनाइ छ।
अर्कोतिर, पूर्वराष्ट्रपति जैर बोल्सोनारोका छोरा फ्लाभियोले भने चुनावी नतिजामाथि प्रश्न उठाउँदै लुलाको जित रद्द गराउन प्रयास गर्ने बताएका छन्। सर्वोच्च अदालतले मतदानको समय दुई घण्टा थपेको विषयलाई उनले विवादको आधार बनाएका हुन्।
मतदानको समय थप्ने निर्णय लुलाको पक्षबाट केही क्षेत्रमा सार्वजनिक यातायातको अभावका कारण मतदातालाई मतदान केन्द्रसम्म पुग्न कठिन भएको गुनासो आएपछि गरिएको थियो। अदालतको निर्णयपछि मतदानको समय थपिएको विषयलाई लिएर विवाद सुरु भएको हो।
ट्रम्पले सोमबार पत्रकारहरूसँग कुरा गर्दै मतदानको समय थपिएको विषय अस्वाभाविक लागेको बताए। उनले चुनाव ‘अर्को धाँधलीपूर्ण चुनाव जस्तो देखिएको’ टिप्पणी गरे पनि आफ्नो दाबी पुष्टि गर्ने प्रमाण दिएका छैनन्। उनले चुनावमा आफूले कुनै पक्ष नलिएको पनि बताए।
ब्राजिलका उपराष्ट्रपति गेराल्डो अल्कमिनले भने ट्रम्पको टिप्पणीलाई ‘पूर्णतया गलत’ र ‘निराधार’ भनेका छन्। निर्वाचन अधिकारीहरूले पनि मतदानको समय थपिएको विषयले नतिजामा असर नपारेको बताए।
लुलाले फ्लाभियोलाई ४४ लाखभन्दा बढी मतले हराएका थिए। निर्वाचनसम्बन्धी तथ्यांकअनुसार थपिएको दुई घण्टामा ३४ हजार ३३० जनाले मात्र मतदान गरेका थिए। कुल मतको तुलनामा यो संख्या निकै कम हो।
लुलाको जितसँगै उनले चौथो कार्यकाल सम्हाल्नेछन्। उनको जितलाई विभिन्न देशका नेताहरूले बधाई दिएका छन्। तर, संसदमा दक्षिणपन्थी सांसदको प्रभाव बढेकाले आफ्नो राजनीतिक कार्यक्रम अघि बढाउन उनलाई चुनौती हुने देखिएको छ।
निर्वाचनको नतिजापछि ब्राजिलको मुद्रा र सेयर बजारमा पनि गिरावट आएको छ। लगानीकर्ताहरूले आगामी सरकारको आर्थिक नीतिबारे स्पष्टता खोजिरहेको विश्लेषकहरूले बताएका छन्। एजेन्सी
प्रकाशित: १० कार्तिक २०८३ ०७:०२ मंगलबार
