प्रहरीको चाडपर्वलाई लक्षित विशेष सुरक्षा योजनाका बाबजुद सप्तरीमा एक पुरूषको हत्या र एक महिला सामूहिक बलात्कारको शिकार भएकी छन् ।
राजविराज — चाडपर्वलाई लक्षित गरी प्रहरीले झण्डै ९ सय सुरक्षाकर्मी परिचालन गरेर विशेष सुरक्षा योजना लागू गरेको दाबी गरिरहँदा पनि सप्तरीमा जघन्य अपराधका घटना भने रोकिएका छैनन् । सुरक्षा कडाइका बाबजुद यहाँ एक पुरूषको हत्या भएको छ भने मूर्ति विर्सजन गरेर घर फर्किँदै गरेकी एक महिला सामूहिक बलात्कारको शिकार भएकी छन् ।
गत मंगलबार दिउँसो छिन्नमस्ता गाउँपालिका–४ लालापट्टीका ५० वर्षीय अरबिन्द यादव धानखेतमा घाइते अवस्थामा भेटिएका थिए । पराल लगेको विषयमा विवाद हुँदा स्थानीयले उनीमाथि कोदालो प्रहार गरेका थिए । टाउकोमा गम्भीर चोट लाग्दा खेतमै ढलेका यादवलाई उपचारका लागि राजविराजस्थित गजेन्द्रनारायण सिंह अस्पताल ल्याइएको थियो । उपचारकै क्रममा उनको सोही दिन पौने ४ बजेतिर मृत्यु भएको हो । घटनापछि परिवारजनले सोही ठाउँका ६ जनाविरूद्ध जाहेरी दिएका छन् । ‘कुटपिटबाट बुबा खेतमै ढल्दा २-३ घण्टासम्म हामीलाई थाहै भएन,’ मृतकका छोरा अजय यादवले भने, ‘बुबालाई कुटपिट गर्नेहरूलाई हदैसम्मको कारबाही भए मात्रै हामीले न्याय पाउँछौं ।’
आरोपितमध्ये ४ जनालाई प्रहरीले नियन्त्रणमा लिए पनि दुई जना अझै फरार छन् । उनीहरूको खोजीसँगै थप अनुसन्धान भइरहेको सप्तरीका प्रहरी प्रमुख एसपी रूपक खड्काले बताए ।
यस्तै ४ कार्त्तिकमा दुर्गा पूजाको मूर्ति विसर्जन गरेर घर फर्किँदै गरेकी २५ वर्षीया एक महिला सुरूङ्गा नगरपालिकामा सामूहिक बलात्कारको शिकार भएकी छन् । सिरहाकी ती महिला विजया दशमी मेला हेर्न भिनाजुको घर आएकी थिइन् । गत बुधबार साँझ मूर्ति विसर्जन गर्न उनी ट्याक्टर चढेर बलान नदी गएकी थिइन् ।
त्यहाँबाट फर्किरहँदा तेल सकिएर ट्याक्टर रोकिएको थियो । उनी एक्लै हिँडेर घरतर्फ गइरहेको बेला स्थानीय ३ युवकले मुख थुन्दै नियन्त्रणमा लिएका थिए । नजिकैको आँप बगानमा पुर्याएर धम्की दिँदै उनीहरूले बलात्कार गरेको पीडितको जाहेरीमा उल्लेख गरेको प्रहरीको भनाइ छ । घटनापछि बेहोस भएकी महिलालाई आफन्त र स्थानीयले उद्धार गरेका थिए ।
पीडितका परिवारजनले गत बिहीबार दिउँसो इलाका प्रहरी कार्यालय कडरबोना पुगेर तीनै जनाविरूद्ध जाहेरीसमेत दिएका छन् । तर आरोपितहरू भने पक्राउ परेका छैनन् । एसपी खड्काले आरोपितको खोजी भइरहेको बताए । उनका अनुसार पीडितको स्वास्थ्य परीक्षण, घटनास्थलको मुचुल्कालगायतका कानूनी प्रक्रिया पूरा भइसकेको छ । ‘तीनै जनाविरूद्ध जबरजस्ती करणीसम्बन्धी कसूरमा मुद्दा दर्ता भइसकेको छ,’ एसपी खड्काले भने, ‘आरोपितहरू फरार छन् । उनीहरूको खोजी जारी छ ।’
आपराधिक घटना नियन्त्रण गर्न प्रहरीले दसैं, तिहार र छठ पर्वलाई लक्षित गरी यहाँ ८५७ नेपाल प्रहरी र ३९ जना ट्राफिक प्रहरी परिचालन गरेर विशेष सुरक्षा योजना लागू गरेको छ । योजनाअन्तर्गत सादा पोसाकमा प्रहरी परिचालनदेखि पैदल गस्ती, मोबाइल टोलीसम्म खटाइएको प्रहरीको भनाइ छ ।
विद्यानन्द विद्यानन्द राम कान्तिपुरका सप्तरी संवाददाता हुन् । उनी समसामयिक बिषयमा रिपाेर्टिङ गर्छन् ।
