नेपाल प्रिमियर लिग (एनपीएल) खेल्न नेपाल आएका पाकिस्तानी क्रिकेटर साहिबजादा फरहान पाकिस्तान फर्किने तयारीमा रहेका छन्। पाकिस्तान क्रिकेट बोर्ड (पीसीबी) ले श्रीलंकाविरुद्धको आगामी खेलका लागि राष्ट्रिय टोलीमा समावेश गरिएको भन्दै उनलाई फर्किन इमेल पठाएपछि उनको एनपीएल सहभागिता थप अनिश्चित बनेको हो।
कर्णाली याक्सले फरहानलाई टोलीमा अनुबन्ध गरेको थियो। तर, पीसीबीले एनपीएलमा सहभागी हुने पाकिस्तानी खेलाडीका लागि प्रतिखेलाडी २५ हजार अमेरिकी डलर मागेको विषयले उनको सहभागितामा यसअघि नै अन्योल सिर्जना गरेको थियो। अहिले राष्ट्रिय टोलीमा बोलाइएको इमेल आएपछि उनी नेपालमै रहेर एनपीएल खेल्ने सम्भावना झनै कमजोर बनेको छ।
पीसीबीले मागेको २५ हजार अमेरिकी डलर तिर्ने विषयमा कर्णाली याक्स र खेलाडी पक्षबीच सहमति जुट्न सकेको छैन। फ्रेन्चाइज र खेलाडीका एजेन्टले आधा–आधा रकम व्यहोर्ने प्रस्ताव अघि सारे पनि त्यसमा सहमति हुन नसकेको हो।
कर्णाली याक्सले उक्त रकम थप्न नसक्ने अवस्था रहेको जनाउँदै फरहानको विकल्प खोज्न थालेको छ। यसअघि नेपाल क्रिकेट संघ (क्यान) र पाकिस्तानस्थित नेपाली दूतावासले पनि समस्या समाधानका लागि पहल गरिरहेका थिए। तर, अहिलेसम्म विवाद टुंगिएको छैन।
पाकिस्तानले घरेलु मैदानमा इंग्ल्याण्ड र श्रीलंकासँग त्रिकोणात्मक एकदिवसीय शृङ्खला खेलिरहेको छ। पाकिस्तानको टी–२० टोलीका कप्तान फरहानलाई यसअघि उक्त शृङ्खलाका लागि सार्वजनिक गरिएको एकदिवसीय टोलीमा राखिएको थिएन।
तर, श्रीलंकाविरुद्धको आगामी खेलमा टोलीमा समावेश गरिएको भन्दै पीसीबीबाट इमेल आएको बताइएको छ। यद्यपि, टोलीमा गरिएको हेरफेरबारे पीसीबीले औपचारिक घोषणा गरेको देखिएको छैन। त्यसैले फरहानलाई राष्ट्रिय टोलीमा बोलाइएको विषयको औपचारिक पुष्टि हुन बाँकी छ।
कर्णाली याक्सले फरहानसँगै पाकिस्तानी अलराउण्डर हुसेन तलातलाई पनि अनुबन्ध गरेको छ। फरहानको सहभागिता अनिश्चित बने पनि फ्रेन्चाइजले तलात भने एनपीएल खेल्न आउने अपेक्षा गरेको छ।
तलात हाल पाकिस्तानको राष्ट्रिय टोलीमा छैनन्। उनले पाकिस्तानबाट एक टेस्ट, १२ एकदिवसीय र २३ टी–२० अन्तर्राष्ट्रिय खेल खेलेका छन्। उनी पछिल्लोपटक गत मार्चमा पाकिस्तानको राष्ट्रिय टोलीबाट एकदिवसीय खेलमा सहभागी भएका थिए।
तलातले यसअघि एनओसी पाएर नेपाल आएको बताइए पनि पीसीबीले पाकिस्तानी खेलाडीको सहभागिताका लागि राखेको सर्तका कारण उनको अवस्थाबारे पनि स्पष्टता आवश्यक छ।
