बायर्नविरुद्ध खेलको दसौँ मिनेटमै मैदान छाडेका साकाको चोट कति गम्भीर छ भन्ने थप परीक्षणपछि मात्रै स्पष्ट हुनेछ।
काठमाडौँ — आर्सनलका विङ्गर बुकायो साकाले चोटका कारण शनिबार एभर्टनविरुद्धको प्रिमियर लिग खेल गुमाउने भएका छन् । कम्मरमा लागेको चोटको गम्भीरता पत्ता लगाउन थप परीक्षण गरिने प्रशिक्षक मिकेल आर्टेटाले बताएका छन् ।
२५ वर्षीय साकालाई बुधबार बायर्न म्युनिखविरुद्धको च्याम्पियन्स लिग खेलमा चोट लागेको थियो । उक्त खेल २–२ गोलको बराबरीमा सकिएको थियो । खेलको १०औँ मिनेटमा चोट लागेपछि उनी मैदान छाड्न बाध्य भएका थिए ।
आर्टेटाका अनुसार साकाको जाँघमा तरल पदार्थ जमेकाले चोटको गम्भीरता तत्काल यकिन गर्न कठिन भएको छ । उनको एमआरआईसहित थप परीक्षण गरिनेछ ।
विशेषज्ञ चिकित्सकको रायपछि मात्रै चोटको अवस्थाबारे स्पष्ट हुने आर्टेटाले बताएका छन् । खेलाडीको व्यस्त खेलतालिकाप्रति पनि आर्टेटाले चिन्ता व्यक्त गरेका छन् ।
लगातारका खेलले खेलाडीमाथि शारीरिक दबाब बढाइरहेको भन्दै उनले सम्बन्धित निकायलाई खेलाडीको स्वास्थ्यमा थप ध्यान दिन आग्रह गरेका छन् ।
विनयज्योति सापकोटा कान्तिपुर टेलिभिजनका खेलकूद संवाददाता हुन् ।
