काठमाडौंमा जारी एनपीएलमा मिसबाह उल हक सुदूरपश्चिम रोयल्सको प्रशिक्षकको भूमिकामा छन् ।
काठमाडौं — पाकिस्तानका पूर्वकप्तान मिसबाह उल हकले नेपालका लागि पाकिस्तानका राजदूत आमिर खानसँग भेटवार्ता गरेका छन् । काठमाडौंमा जारी नेपाल प्रिमियर लिग (एनपीएल)मा मिसबाह सुदूरपश्चिम रोयल्सको प्रशिक्षकको भूमिकामा छन् ।
उनका लागि काठमाडौंस्थित पाकिस्तानी दूतावासले रात्रिभोजको आयोजना गरेको थियो । उक्त अवसरमा सुदूरपश्चिम रोयल्सका निर्देशक जगत टमाटासहित दूतावासका प्रतिनिधिहरूको उपस्थिति थियो ।
मिसबाहको प्रशिक्षणमा रहेको सुदूरपश्चिमले मंगलबार लुम्बिनी लायन्ससँग एनपीएलको क्वालिफायर-१ मा प्रतिस्पर्धा गर्दैछ । यसमा जित्ने टोली फाइनल पुग्नेछ । मिसबाहको कप्तानीमा पाकिस्तानले सन् २०१२ को एसिया कप जितेको थियो भने सन् २०१६ मा आईसीसीको नम्बर १ टेस्ट टोली बनेको थियो ।
क्रिकेट सबैको चासो भएको र यसले मानिसहरूलाई नजिक बनाउने गरेको तथा नेपाल र पाकिस्तानबीचको सम्बन्धलाई बलियो बनाएको पाकिस्तानी दूतावासले जनाएको छ ।