मेची–महाकाली पदयात्रामा हिँडेका सांसद सिंहलाई रास्वपा सभापति रवि लामिछानेले जनकपुरको जानकी मन्दिर प्रांगणबाट बिदाई गरेका हुन् ।
जनकपुर — राष्ट्रिय स्वतन्त्र पार्टी(रास्वपा)का संघीय सांसद अमरेशकुमार सिंहले सोमबारदेखि जनकपुरबाट पदयात्रा थालेका छन् ।
मेची–महाकाली पदयात्रामा हिँडेका सांसद सिंहलाई पार्टीका सभापति रवि लामिछानेले जनकपुरको जानकी मन्दिरको प्रांगणबाट बिदाई गरेका हुन् । सभापति लामिछानेले सांसद सिंहलाई राष्ट्रिय झन्डा र पार्टीको झन्डा दिएर देशमा शान्ति, सद्भाव र भाइचाराको सन्देश छर्न मेची–महाकाली पदयात्राले सार्थकता प्रदान गर्ने बताए ।
सभापति लामिछानेले चुनावका बेला मधेश र पहाडले पार्टी जोडेजस्तै मेची–महाकाली पदयात्राले देश जोड्ने काम गर्ने बताए ।
पदयात्रामा निस्किएका सांसद सिंहले जनकपुरबाट सांकेतिकरुपमा यात्रा थालिए पनि मंगलबार बिहान झापाबाट यात्राको बिधिवत सुरुवात हुने बताए । उनले पदयात्राको मुख्य उदेश्य जनताको कुरा सुन्ने रहेको बताए ।
छठ पर्व मनाउन शनिबार जनकपुर आएका रास्वपा सभापति लामिछानेले सोमबार बिहान जनकपुरको जानकी मन्दिर पुगेर पुजाअर्चना गरे । लामिछाने सोमबार नै काठमाडाैं फर्किने भए पनि बाक्लो हुस्सुको कारण जहाज उडान नहुँदा जनकपुरमै अड्किएका छन् ।
अजित पत्रकार तिवारी कान्तिपुरका जनकपुर संवाददाता हुन् ।