मुखमा मास्क लगाएर क्यामेराअघि बोलेका हानले प्रहरीसमक्ष लिखित रूपमा आफ्नो अपराध स्वीकार गरिसकेको बताएका छन्
काठमाडौँ — दक्षिण कोरियामा कर लेखापालको राष्ट्रिय परीक्षामा सर्वोत्कृष्ट अंक ल्याएका व्यक्तिले जेनेरेटिभ एआईको प्रयोग गरेर चिट चारेको स्वीकारेका छन् । आइतबार उनको यो खुलासासँगै विगत केही महिनादेखि चलिरहेको आशंका सत्य सावित भएको छ ।
गएको अप्रिल र जुलाईमा लिइएका दुईवटा परीक्षामा सयौं प्रश्नहरूको उत्तर शतप्रतिशतजस्तै मिलाएपछि उनी चर्चामा थिए । त्यसबेलै कतिपयले उनले एआईको सहयोगले चिट चारेको हुनसक्ने आशंका गरेका थिए ।
‘एटोर्नी ली डोन–हो’ नामक युट्युब च्यानलमा माफी माग्दै उनले भने, ‘मैले इलेक्ट्रोनिक यन्त्रहरू र जेनेरेटिभ एआईको प्रयोग गरेर चिट चोरेको हुँ। मेरो यो सफलता कुनै निष्पक्ष मेहनतको परिणाम होइन ।’ उनले आफ्नो थर ‘हान’ रहेको बताएका छन् ।
हानले सूक्ष्म क्यामेरा (माइक्रोक्यामेरा) को सहायताले परीक्षाका प्रश्नहरूको तस्बिर खिचेर एआई टूलमा पठाउने र स्मार्टफोनमार्फत उत्तरहरू हेर्ने गरेको खुलासा गरे ।
मुखमा मास्क लगाएर क्यामेराअघि बोलेका हानले प्रहरीसमक्ष लिखित रूपमा आफ्नो अपराध स्वीकार गरिसकेको पनि बताएका छन् । रोयटर्सले यस विषयमा सोल जुङ्बु प्रहरी स्टेशनमा सम्पर्क गर्न खोज्दा कुनै जवाफ पाउन सकेन ।
यस घटनाले दक्षिण कोरियामा ठूलै हलचल ल्याएको छ ।सरकारी सेवा गर्नुलाई यहाँँ प्रतिष्ठाका रुपमा लिइन्छ । दक्षिण कोरियामा आउँदो बिहीबार राष्ट्रिय कलेज प्रवेश परीक्षा हुन गइरहेको छ । यस घटनाले उक्त परीक्षाको व्यवस्थापन र कडाईका विषयमा पनि चिन्ता सुरु भएको छ ।
राष्ट्रपतिको कार्यालयका एक वरिष्ठ अधिकारीले आइतबार पत्रकारहरूसँग कुरा गर्दै भने, ‘राष्ट्रपतिको कार्यालयले यस विषयलाई निकै गम्भीर रूपमा लिएको छ । अर्को साता कलेज प्रवेश परीक्षा हुने भएकाले हामीले यसका लागि कडा सुरक्षात्मक उपायहरूको तयारी गरिरहेका छौं ।’
.png)
