पछिल्लो समय देशभर सडक दुर्घटनाका घटना बढ्दै जानु गम्भीर चिन्ताको विषय भन्दै कांग्रेसले सरकारले तत्काल उच्चस्तरीय कार्यदल गठन गरी यस्ता दुर्घटनाका कारणको गहन अध्ययन गर्न पनि आग्रह गरेको छ ।
काठमाडौँ — कांग्रेसले भीमफेदीमा भएको माइक्रोबस दुर्घटनाप्रति दुःख व्यक्त गर्दै मृतकका परिवारलाई तत्काल उचित राहतको व्यवस्था गर्न र घाइतेको निःशुल्क एवं प्रभावकारी उपचारको प्रबन्ध गर्न सरकारसँग माग गरेको छ ।
प्रेस विज्ञप्ति जारी गर्दै कांग्रेसले मृतकप्रति भावपूर्ण श्रद्धाञ्जली अर्पण गर्दै आत्माको चिरशान्तिको कामना गरेको छ ।कार्यवाहक मुख्यसचिव कृष्णप्रसाद दुलालद्वारा जारी प्रेस विज्ञप्तिमा भनिएको छ, 'मृतकका परिवारलाई तत्काल उचित राहतको व्यवस्था गर्न र घाइतेको निःशुल्क एवं प्रभावकारी उपचारको प्रबन्ध गर्न नेपाली कांग्रेस नेपाल सरकारसँग जोडदार माग गर्दछ ।'
कांग्रेसले पछिल्लो समय देशभर सडक दुर्घटनाका घटनाहरू बढ्दै जानु गम्भीर चिन्ताको विषय भएको जनाएको छ । 'सडक दुर्घटनाको बढ्दो जोखिमलाई न्यूनीकरण गर्न सरकारले तत्काल उच्चस्तरीय कार्यदल गठन गरी यस्ता दुर्घटनाका कारणहरूको गहन अध्ययन गर्नुका साथै सडक सुरक्षा, सवारीसाधनको अवस्था, चालकको जिम्मेवारी र यातायात व्यवस्थापनमा देखिएका कमजोरी पहिचान गरी प्रभावकारी नीतिगत तथा व्यावहारिक सुधारका उपाय अवलम्बन गर्न नेपाली कांग्रेस सरकारको गम्भीर ध्यानाकर्षण गर्दछ,' विज्ञप्तिमा भनिएको छ ।
बिहीबार बिहान मकवानपुरको भीमफेदी–६ स्थित चिसापानीगढीमा दुर्घटना हुँदा १४ जनाको मृत्यु भएको छ । ६ जना गम्भीर घाइते भएका छन् ।
काठमाडौँबाट सर्लाहीको चक्रघट्टा गाउँपालिकाको सुन्दरपुरतर्फ जाँदै गरेको मधेश प्रदेश ०३–००१ ज ०८८० नम्बरको यात्रुबाहक विद्युतीय माइक्रो दुर्घटनामा परेको थियो ।
