विनयबाबु बस्नेत स्मृति प्रतिष्ठानको आयोजनामा भएको प्रतियोगिताको सोमबार सम्पन्न फाइनल खेलमा एसआरजी आग्रालाई ३–० को सोझो सेटमा हराउँदै हेटौंडाले उपाधि जितेको हो ।
हेटौंडा — मकवानपुरको थाहा नगरपालिकामा सम्पन्न अन्तरपालिका जिल्लास्तरीय खुला भलिबल प्रतियोगिताको उपाधि हेटौंडा उपमहानगरपालिकाले हात पारेको छ । विनयबाबु बस्नेत स्मृति प्रतिष्ठानको आयोजनामा भएको प्रतियोगिताको सोमबार सम्पन्न फाइनल खेलमा एसआरजी आग्रालाई ३–० को सोझो सेटमा हराउँदै हेटौंडाले उपाधि जितेको हो ।
थाहा नगरपालिका–२ स्थित फाँटबजारको भलिबल मैदानमा भएको फाइनल खेलको सुरुवातदेखि नै दुवै पक्षबाट आक्रामक खेल प्रस्तुत भएको थियो । पहिलो सेटमा हेटौंडा र एसआरजी आग्राबीच निकै प्रतिस्पर्धा देखियो । एकपछि अर्को अंकका लागि दुवै टोलीले गरेको संघर्षले खेललाई थप रोमाञ्चक बनाएको थियो । अन्तिमसम्म प्रतिस्पर्धा कायम रहेको पहिलो सेटमा हेटौंडाले २६–२४ को जित निकाल्दै खेलमा अग्रता बनायो ।
दोस्रो सेटमा हेटौंडाले खेलमाथि आफ्नो पकड बलियो बनाउँदै २५–१७ को सहज जित निकाल्यो । दुई सेट लगातार गुमाएको एसआरजी आग्राले तेस्रो सेटमा खेलमा फर्किने प्रयास गरे पनि हेटौंडाको उत्कृष्ट प्रदर्शनसामु सफल हुन सकेन । तेस्रो सेटमा पनि हेटौंडाले एकपक्षीय प्रदर्शन गर्दै २५–१२ को जित निकाल्यो । यससँगै हेटौंडाले फाइनल खेल ३–० को सोझो सेटमा जित हासिल गरेको थियो ।
फाइनल खेलमा उत्कृष्ट प्रदर्शन गरेका हेटौंडाका मनिष गुरुङ म्यान अफ द म्याच घोषित भए । उपाधि जितेसँगै हेटौंडाले १ लाख १ हजार १११ रुपैयाँसहित शिल्ड, मेडल र प्रमाणपत्र प्राप्त गरेको थियो । फाइनलमा पराजित हुँदै उपविजेतामा सीमित भएको एसआरजी आग्राले नगद ५० हजार ५५५ रुपैयाँसहित शिल्ड, मेडल र प्रमाणपत्र हात पारेको थियो । प्रतिष्ठानले यस वर्षबाट पुरस्कार राशिको रकम वृद्धि गरेर बाहिरी पालिकाका टिमहरू सहभागी हुन पाउने गरी प्रतियोगिता आयोजना गरेको थियो । थाहा नगरपालिकाको सहयोगमा भएको प्रतियोगितामा ११ वटा टिमको सहभागिता रहेको थियो ।
प्रतिष्ठानका अध्यक्ष शंकर कार्कीको सभाध्यक्षतामा तथा थाहा नगरका नगरप्रमुख विष्णु विष्टको प्रमुख आतिथ्यमा पुरस्कार वितरण भएको थियो । पुरस्कार वितरण समारोहमा नगरपालिकाका उपप्रमुख भरत गोपालीको पनि आतिथ्य रहेको थियो ।
प्रताप विष्ट कान्तिपुरको हेटौडा संवाददाता हुन् । उनी स्थानिय राजनीतिक र सामाजिक मुद्धाबारे रिपोर्टिङ/टिप्पणी लेख्छन् ।
