राष्ट्रपति आइज्याक हर्जोगको निर्णयपछि पूर्वसैनिक प्रमुख आइजेनकोटले राष्ट्रिय आपत्कालीन सरकार बनाउने आह्वान गर्दै राजनीतिक गतिरोध अन्त्य गर्ने चुनौती सामना गरेका छन्।
काठमाडौँ — इजरायलका राष्ट्रपति आइज्याक हर्जोगले नयाँ सरकार गठनका लागि विपक्षी नेता गादी आइजेनकोटलाई जिम्मेवारी दिने भएका छन् ।
बीबीसी का अनुसार गत साता भएको निर्वाचनमा प्रधानमन्त्री बेन्जामिन नेतान्याहू र आइजेनकोट नेतृत्वका कुनै पनि गठबन्धनले संसद्मा बहुमत ल्याउन नसकेपछि राष्ट्रपतिले आइजेनकोटलाई पहिलो अवसर दिने निर्णय गरेका हुन् ।
राष्ट्रपति कार्यालयका अनुसार हर्जोगले आफ्नो निर्णयबारे आइजेनकोट र नेतान्याहू दुवैलाई जानकारी गराइसकेका छन् । नयाँ संसद्का सदस्यहरूसँगको परामर्शमा आइजेनकोटलाई प्रधानमन्त्री बनाउन ६७ र नेतान्याहूलाई ४६ जनाले समर्थन जनाएका थिए ।
अब आइजेनकोटले सरकार गठनका लागि २८ दिनको समय पाउनेछन् । आवश्यक परे थप १४ दिन समय दिन सकिनेछ । पूर्वसैनिक प्रमुखसमेत रहेका आइजेनकोटले सामाजिक सञ्जाल एक्समा 'राष्ट्रिय आपत्कालीन सरकार गठन गर्ने समय आएको' बताएका छन् ।
इजरायलको १२० सदस्यीय संसद् नेसेटमा नेतान्याहूको दक्षिणपन्थी लिकुड पार्टी र उसका सहयोगी दलले ५३ सिट जितेका छन् । आइजेनकोटको मध्यमार्गी याशार पार्टीसहित उनको गठबन्धनमा रहेका चार यहुदी दलले ४८ सिट जितेका छन् ।
त्यस्तै, अरब समुदायको नेतृत्वमा रहेका युनाइटेड अरब लिस्ट र जोइन्ट लिस्टले संयुक्त रूपमा १९ सिट जितेका छन् । अरब मतदाताको उल्लेख्य सहभागिताका कारण यी दलले अहिलेसम्मकै बढी सिट प्राप्त गरेका हुन् । उनीहरूको समर्थन सरकार गठनमा निर्णायक हुन सक्ने देखिएको छ । तर यहुदी दलमध्ये एउटाबाहेक सबैले निर्वाचनअघि अरब दलसँग मिलेर सरकार गठन नगर्ने बताएका थिए ।
निर्वाचन परिणामले सरकार गठनका तीन सम्भावना देखाएको थियो । नेतान्याहू र आइजेनकोट सहभागी राष्ट्रिय एकताको सरकार, आइजेनकोटको गठबन्धनबाट केही सांसद अलग भएर बन्ने नेतान्याहू नेतृत्वको सरकार र अरब दलको समर्थनमा बन्ने आइजेनकोट नेतृत्वको सरकार ।
आइजेनकोट र उनको गठबन्धनका एक सदस्यबाहेक सबैले अरब दलसँग मिलेर सरकारमा सहभागी नहुने बताउँदै आएका छन् । यद्यपि, उनीहरूबीच सहमति हुन सक्ने सम्भावनाबारे पनि चर्चा भइरहेको छ । तर त्यसका लागि पनि सहमति जुटाउन सहज देखिँदैन ।
इजरायलमा राष्ट्रिय एकताको सरकार गठनको अभ्यास यसअघि पनि भएको थियो । सन् २०२० मा लगातार तीनवटा निर्वाचनपछि पनि सरकार गठन हुन नसक्दा नेतान्याहू र उनका मध्यमार्गी प्रतिस्पर्धी बेन्नी गान्ट्जबीच सत्ता साझेदारीको सहमति भएको थियो । त्यसअनुसार दुवैले पालैपालो सरकारको नेतृत्व गरेका थिए ।
राष्ट्रपति हर्जोगले राजनीतिक दलहरूसँगको परामर्शका क्रममा अर्को निर्वाचन रोक्न र स्थिर सरकार बनाउन सबै दलले आफ्ना प्रतिबद्धता र वाचा पूरा गर्न नसकिने वर्तमान यथार्थ बुझ्नुपर्ने बताएका थिए ।
सन् २०१९ देखि २०२२ सम्म इजरायलमा राजनीतिक अस्थिरताका कारण पाँचपटक निर्वाचन भएको थियो । त्यस अवधिमा नेतान्याहू र उनका प्रतिस्पर्धीहरूबीच सरकार गठनका लागि सहमति जुट्न सकेको थिएन ।
