तिहारको अवसरमा धनकुटाको ऐतिहासिक निशान भगवती मन्दिर परिसर र परिचयमोड–५२ ढोका सडक झिलिमिली बत्तीले सिंगारिएपछि साँझपख घुमफिर गर्ने र रमाउनेहरूको चहलपहल बढेको छ।
धनकुटा — तिहारको अवसरमा धनकुटाको ऐतिहासिक निशान भगवती मन्दिर परिसर र परिचयमोड–५२ ढोका सडक झिलिमिली बत्तीले सिंगारिएपछि साँझपख घुमफिर गर्ने र रमाउनेहरूको चहलपहल बढेको छ। रंगीबिरंगी बत्तीले सिंगारिएका मन्दिर परिसर र सडकमा फोटो खिच्ने तथा टिकटक बनाउनेहरूको भिड लाग्न थालेको छ।
तिहारलाई लक्षित गर्दै स्थानीय युवाहरूको सक्रियतामा दाताहरूबाट आवश्यक रकम जुटाएर मन्दिर परिसर र सडक क्षेत्रमा आकर्षक बत्ती जडान गरिएको हो। बत्ती जडानका लागि नेपाली सेना र ट्राफिक प्रहरीले समेत सहयोग गरेका छन्।
बत्तीले सिंगारिएपछि मन्दिर परिसर र परिचयमोडदेखि ५२ ढोकासम्मको सडक क्षेत्र रातको समयमा झनै आकर्षक देखिएको छ। तिहारको रमझमसँगै उज्यालो बनेको क्षेत्रमा परिवारसहित घुम्न आउने, फोटो खिच्ने र टिकटक बनाउने युवायुवती तथा बालबालिकाको चहलपहल बढेको छ।
तिहारको अवसरमा गरिएको यो सजावटले धार्मिक तथा ऐतिहासिक महत्त्व बोकेको निशान भगवती मन्दिरको आकर्षण बढाउनुका साथै धनकुटा बजारको रौनकसमेत थपेको छ।
विनोद घिमिरे कान्तिपुर संवाददाता हुन्।
