गुल्मीको राक्सेमा बिहीबार राति खसेको पहिरो हटाएपछि शुक्रबार बिहानदेखि यातायात सञ्चालनमा आएको छ, तर कमजोर जमिनका कारण जोखिम कायमै छ।
बुटवल — सुक्खा पहिरोका कारण बिहीबार रातिदेखि अवरुद्ध कालीगण्डकी करिडोरको गुल्मी खण्ड शुक्रबार बिहानदेखि सुचारु भएको छ । करिडोरको गुल्मीमा पर्ने रुद्रवेणी–पूर्तिघाट खण्डको कालीगण्डकी गाउँपालिका–२ राक्सेमा सडकमाथिबाट पहिरो खसेपछि यातायात अवरुद्ध भएको थियो ।
कालीगण्डकी करिडोर सडक योजना कार्यालयले गुल्मीको हर्मिचौरदेखि गुल्मी र बागलुङको सीमाक्षेत्र पालुङ खोलासम्मको सडक निर्माण सम्पन्न गरी मर्मतसम्भारका लागि गत असारमा सडक डिभिजन कार्यालय पाल्पालाई हस्तान्तरण गरेको थियो ।
सडक हस्तान्तरण भए पनि राक्सेको करिब १ सय ५० मिटर क्षेत्रमा जमिन कमजोर भएकाले पटकपटक सुक्खा र हिलेसहितका पहिरो जाने गरेको सडक डिभिजन कार्यालय पाल्पाका निमित्त प्रमुख इन्जिनियर पवित्रमणि आचार्यले बताए ।
‘बिहीबार रातिको पहिरो हटाएपछि केहीबेर अघिदेखि सडक सुचारु भएको छ,’ उनले भने, ‘राक्सेको १ सय ५० मिटर दूरीको क्षेत्रमा जमिन अत्यन्तै कमजोर भएकाले दिनहुँ पहिरो जाने गरेको छ । त्यसैले एउटा मेसिन त्यहीँ राखेर निरन्तर पहिरो पन्छ्याउने काम गरिरहेका छौं ।’
त्यस क्षेत्रको जमिन र डाँडाकै अध्ययन गर्नुपर्ने देखिएपछि भूगर्भ विभागलाई पत्राचार गरिएको र तिहारपछि अध्ययनका लागि विभागको टोली आउने उनले बताए ।
गुल्मीको रुद्रवेणीदेखि मालढुंगासम्मको सडक खण्डका केही स्थानमा अहिले पनि निर्माणको काम जारी छ । तर, निर्माण सम्पन्न भएर हस्तान्तरण भइसकेको राक्से क्षेत्रमा सुक्खा र हिले पहिरोकै कारण पटकपटक सडक अवरुद्ध हुने गरेको छ । यसअघि पनि असोजको पहिलो साता परेको पानीले उक्त क्षेत्रमा पहिरो गएको थियो ।
घनश्याम गौतम कान्तिपुरका बुटवल संवाददाता हुन् ।
(174).png)
