काठमाडौँ, कात्तिक २० गते । गोरखापत्र संस्थानको साहित्यिक प्रकाशन मधुपर्क मासिकको सम्पादकमा केदारप्रसाद भट्टराई नियुक्त हुनुभएको छ । गोरखापत्र दैनिकमा हाल अर्थबजार ब्युरो प्रमुख तथा गोरखापत्र एकेडेमीका निर्देशक रहनुभएका कार्यकारी सम्पादक भट्टराईलाई संस्थान व्यवस्थापनले मधुपर्कको सम्पादकमा नियुक्त गरेको हो । संस्थानका महाप्रबन्धक हिक्मतबहादुर रावलले कात्तिक २७ गतेदेखि लागु हुने गरी उहाँलाई सो जिम्मेवारी दिनुभएको हो ।
२०४८ सालदेखि पत्रकारितामा आबद्ध भट्टराई २०५५ साल मङ्सिर २८ गतेदेखि गोरखापत्र दैनिकमा (छैटौँ तह) सहायक सम्पादक पदमा नियुक्त हुनुभएको थियो । गोरखापत्रमा प्रमुख समाचारदाताको भूमिकामा काम गर्नुभएका उहाँले गोरखापत्र डिस्कोर्स–२०८२ को संयोजन गर्नुभएको थियो । यसैबिच गोरखापत्र संस्थान व्यवस्थापनले बालबालिकाका लागि सहप्रकाशन मुना मासिकको निमित्त सम्पादकमा प्रकृति अधिकारीलाई नियुक्त गरेको छ । कात्तिक १८ गते बुधबारदेखि लागु हुने गरी उहाँलाई सो जिम्मेवारी दिइएको हो । यसअघि उहाँ मुना मासिकमा सहसम्पादकका रूपमा कार्यरत हुनुहुन्थ्यो । शिक्षा बिटमा लामो समय पत्रकारिता गर्नुभएका अधिकारी २०६६ माघदेखि गोरखापत्रमा स्थायी रूपमा आबद्ध हुनुहुन्छ ।
Read full story at source ( gorkhapatraonline.com )
