बिहीबार सानेपामा बसेको पदाधिकारीहरूको अनौपचारिक बैठकपछि कांग्रेसले अफवाह फैलाउने, निगरानी राख्ने र नेता–कार्यकर्तालाई त्रसित बनाउने प्रयास भइरहेको जनाएको छ ।
काठमाडौं — कांग्रेसले पार्टी नेतृत्वलाई गिरफ्तार गर्न लागिएको भन्दै फैलाइएको हल्लालाई राजनीतिक षड्यन्त्रको संज्ञा दिएको छ । सरकारका गलत क्रियाकलापमाथि प्रश्न उठाउन थालेपछि राज्य संरक्षित गिरोह परिचालन गरेर कांग्रेसविरुद्ध सुनियोजित भ्रम फैलाइएको कांग्रेसको आरोप छ ।
बिहीबार केन्द्रीय कार्यालय सानेपामा बसेको पदाधिकारीहरूको अनौपचारिक बैठकले अनधिकृत व्यक्तिको निर्देशनमा कांग्रेसविरुद्ध काल्पनिक र कृत्रिम विषयहरू फैलाउने, त्यसपछि पार्टी नेतृत्वलाई गिरफ्तार गर्न लागिएको भन्दै अफवाह फैलाउने तथा पार्टीका नेता–कार्यकर्तामाथि विभिन्न माध्यमबाट निगरानी राख्ने र त्रसित बनाउने काम भइरहेको निष्कर्ष निकालेको छ ।
बैठकपछि कांग्रेसले जारी गरेको अपिलमा यस्ता गतिविधिलाई राजनीतिक षड्यन्त्रको निरन्तरता भनेको छ । 'घटनाक्रमले यो षड्यन्त्र पछाडिका पात्र, प्रवृत्ति र नियत उजागर गर्दै गएका छन्,' कांग्रेसले भनेको छ ।
कांग्रेसले प्रश्न गर्न पाउनु नागरिकको नैसर्गिक अधिकार भएको उल्लेख गर्दै प्रश्न उठाउने अधिकार कुण्ठित गर्ने प्रयासको प्रतिवाद गर्ने जनाएको छ । 'प्रश्नलाई बन्द गर्न खोज्ने हरेक प्रयत्नका विरुद्ध कांग्रेस सधैँ उभिनेछ,' अपिलमा भनिएको छ ।
कांग्रेसले गिरफ्तारीसम्बन्धी अफवाह र भ्रममा नपर्न पार्टीका नेता–कार्यकर्तालाई आग्रह गर्दै नागरिकका मुद्दामा केन्द्रित हुन सम्पूर्ण पार्टी पंक्तिलाई अपिल गरेको छ ।
