सोलुखुम्बुको फेरिचेमा दुई हेलिकप्टर आपसमा ठोक्किएको घटनाको अनुसन्धान गर्न नेपाल नागरिक उड्डयन प्राधिकरणले पाँच सदस्यीय छानबिन समिति गठन गरेको छ।
मंगलबार एयर डाइनेस्टी र फिस्टेल एयरका हेलिकप्टर एकआपसमा ठोक्किँदा एक जनाको मृत्यु भएको थियो भने दुई पाइलटसहित तीन जना घाइते भएका थिए।
प्राधिकरणले निर्देशक प्रभाकरचन्द्र मल्लिकको संयोजकत्वमा पाइलट तथा वायुयान इन्जिनियरहरू सम्मिलित समिति गठन गरेको हो।
समितिलाई दुर्घटनाको वास्तविक कारण पत्ता लगाउने, घटनासँग सम्बन्धित प्राविधिक तथा अन्य पक्षको अध्ययन गर्ने र भविष्यमा यस्ता दुर्घटना दोहोरिन नदिन आवश्यक सुझावसहित प्रतिवेदन पेस गर्ने जिम्मेवारी दिइएको छ।
समितिको अनुसन्धानपछि दुर्घटनाका कारण र सुरक्षासम्बन्धी कमजोरीबारे थप तथ्य सार्वजनिक हुने अपेक्षा गरिएको छ।
प्रकाशित: १८ कार्तिक २०८३ १५:१५ बुधबार
.jpeg)
