नेपाल पुनर्बिमा कम्पनीमा लगानी थप्दै सरकार, दियो हकप्रद सेयर जारी गर्न सहमति

बिमा प्राधिकरणले तोकेको २० अर्ब रुपैयाँ चुक्ता पुँजी पुर्‍याउन नेपाल पुनर्बिमा कम्पनीले ५० प्रतिशत हाराहारी हकप्रद सेयर जारी गर्नुपर्नेछ । हाल कम्पनीको चुक्ता पुँजी १३ अर्ब ४२ करोड रुपैयाँ छ ।

काठमाडौँ — नेपाल पुनर्बिमा कम्पनी लिमिटेडमा सरकारले थप लगानी गर्ने भएको छ।

मन्त्रिपरिषद्को मंगलबार बसेको बैठकले हकप्रद सेयरमा लगानी गर्ने निर्णय गरेको हो।

यसमा हाल नेपाल सरकारको ४४.०४ प्रतिशत सेयर स्वामित्व छ । सर्वसाधारणको १६ प्रतिशत र हिमालयन लाइफ इन्स्योरेन्सको ७।२५ प्रतिशत सेयर छ ।

त्यस्तै, एसियन लाइफ इन्स्योरेन्स, सगरमाथा लुम्बिनी इन्स्योरेन्स, राष्ट्रिय बिमा कम्पनी लगायत विभिन्न बिमा कम्पनीको सेयर लगानी छ।

पुनर्बिमा कम्पनीहरूको लागि बिमा प्राधिकरणले २० अर्ब चुक्ता पुँजी तोकेको छ। हाल १३ अर्ब ४२ करोड पुँजी रहेको यसले बाँकी रकम हकप्रद सेयर जारी गरेर जुटाउनेछ।

यसले एक बराबर ०.५ अर्थात् ५० प्रतिशत हाराहारी हकप्रद सेयर जारी गर्नुपर्ने हुन्छ।

मंगलबार यसको सेयर ८०१ रूपैयाँमा कारोबार भइरहेको छ। हकप्रदकै आसमा यसअघि यसको सेयर मूल्य १ हजार ८ सय रूपैयाँसम्म कारोबार भएको थियो। तर, सरकारले लगानी थप्ने नथप्ने अन्योल र सेयर बजार सुस्तिएसँगै मूल्य घट्दो क्रममा रहेको हो।