विराटनगरले वर्षाका कारण पाँच ओभरमा छोट्याइएको खेलमा दुई विकेट गुमाउँदै १०५ रन बनाएपछि सुदूरपश्चिमले १०६ रनको लक्ष्य पाएको छ।
काठमाडौँ — विराटनगर किंग्सले नेपाल प्रिमियर लिग क्रिकेटको शनिबारको दोस्रो खेलमा सुदूरपश्चिम रोयल्सलाई १ सय ६ रनको लक्ष्य दिएको छ । त्रिवि अन्तर्राष्ट्रिय क्रिकेट मैदानमा राति ९.२० बजे सुरु भएको खेलमा टस हारेर ब्याटिङमा आएको विराटनगरले ५ ओभरमा छोट्याइएको खेलमा २ विकेट गुमाई १ सय ५ रन बनाएको हो ।
सुदूरपश्चिम रोयल्सका थारिन्दु रत्नायकेको पहिलो ओभरमा विराटनगर किंग्सले ३५ रन प्रहार गरेको थियो, जसमा सेहन जयसूर्याले ५ छक्का प्रहार गरेका थिए भने एउटा बाई चौका रहेको थियो । जयसूर्या ११ बलमा ३९ रन बनाई आउट भए । यस क्रममा उनले ५ छक्का र २ चौका प्रहार गरे । उनलाई अविनाश बोहराले एलबीडब्लू आउट गरे ।
अर्का ओपनर लोकेश बम १० बलमा १ चौका र ३ छक्का प्रहार गरी २५ रनमा आउट भए । उनी इनिङ्सको अन्तिम बलमा आउट भए । एन्ड्रे रसेलले १० बल खेली २ चौका र ३ छक्का प्रहार गरी २९ रन अविजित रहे ।
विनोद पाण्डे कान्तिपुरका खेलकुद ब्यूरो प्रमुख हुन् ।
.png)
