नेपाली कांग्रेसले महाधिवेशनबाट पारित विचार, नीति तथा कार्यक्रम नागरिकमाझ पुर्याउन मंसिर महिनाभरि विशेष अभियान सञ्चालन गर्ने भएको छ।
कांग्रेस सभापति गगनकुमार थापाले अभियानमार्फत पार्टीका राजनीतिक विचार र कार्यक्रम समर्थक, शुभेच्छुक तथा आम नागरिकसम्म पुर्याइने जानकारी दिएका हुन्। अभियानको विस्तृत कार्ययोजना पार्टी कार्यालयले तयार गर्ने र त्यसको सैद्धान्तिक पक्ष बैठकबाट पारित गरिने उनले बताए।
थापाका अनुसार तिहार र छठलगत्तै पार्टीको लिडरसिप एकेडेमीले काम सुरु गर्नेछ। यसैगरी इलेक्सन ब्युरो र गभर्नेन्स इन्स्टिच्युटलाई सक्रिय बनाइने तथा ‘इन्स्टिच्युट फर फरेन अफेयर्स’ लगायत थप संस्थागत संरचना गठन गरिनेछ।
पार्टीका विभिन्न विभागसमेत गठन गरी नेताहरूको रुचि र क्षमताअनुसार जिम्मेवारी बाँडफाँट गर्ने तयारी कांग्रेसको छ। पदाधिकारीहरूको कार्यविभाजनलाई स्पष्ट बनाउँदै प्रत्येक सहमहामन्त्रीलाई निश्चित कार्यक्षेत्र र कार्यादेश तोकिने थापाले बताए।
उनले पार्टीका नेताहरूलाई आफू कुन निकाय वा विभागमा बसेर काम गर्न इच्छुक छन् भन्ने जानकारी गराउन पनि आग्रह गरेका छन्।
थापाले जिल्ला, क्षेत्र र गाउँ तहका नेताहरूलाई केन्द्रको निर्णयअनुसार पार्टीका गतिविधि सञ्चालन गर्न निर्देशन दिँदै कार्यक्रमलाई औपचारिकतामा सीमित नराख्न जोड दिएका छन्।
प्रकाशित: १३ कार्तिक २०८३ १२:१९ शुक्रबार
