बलिउड अभिनेता सैफ अली खानमाथि भएको आक्रमणको मुद्दामा अदालतमा सुनुवाइ सुरु भएको छ । सैफ र करिना कपुरका कान्छा छोरा जेहको हेरचाह गर्दै आएकी नर्सले अदालतमा ३१ वर्षीय मोहम्मद शरीफुललाई घरमा प्रवेश गरेर आक्रमण गर्ने व्यक्तिका रूपमा चिनाएकी छन् । गत वर्ष जनवरीमा मुम्बईको बान्द्रास्थित सैफको घरमा चोरी गर्ने प्रयासका क्रममा उक्त घटना भएको थियो ।
इन्डियन एक्सप्रेसका अनुसार, यस मुद्दामा उजुरीकर्ता तथा पहिलो साक्षीसमेत रहेकी ५९ वर्षीया नर्सले अदालतमा घटनाको विवरण सुनाएकी छन् । उनी पाँच वर्षभन्दा लामो समयदेखि सैफ र करिनाका कान्छा छोरा जेहको हेरचाह गर्दै आएकी छन् ।
उनका अनुसार, राति करिब २ बजे आवाज सुनेपछि उनको निद्रा खुलेको थियो । बाथरुमको बत्ती बलिरहेको देखेपछि उनले करिना कपुर त्यहाँ रहेको अनुमान गरिन् । तर, फेरि ब्युँझिँदा उनले एक व्यक्तिको छाया जेहको ओछ्यानतर्फ अघि बढिरहेको देखिन् ।
ती व्यक्तिले जेहलाई उठाउन खोज्दा नर्समाथि आराको धारिलो पाताले आक्रमण गरेका थिए । साथै, चुप लाग्न धम्की दिएका थिए ।
अदालतमा बयान दिने क्रममा नर्सले ती व्यक्तिले पैसा माग्दै ‘एक करोड रुपैयाँ’ भनेको बताइन् ।
हल्ला सुनेपछि जेहको हेरचाहमा संलग्न अर्की महिला पनि ब्युँझिइन् र चिच्याउन थालिन् । आवाज सुनेपछि सैफ र करिना आफ्नो कोठाबाट बाहिर आए। सैफले घरमा प्रवेश गर्ने व्यक्तिलाई उनी को हुन् र के चाहन्छन् भनेर सोधे।
त्यसपछि ती व्यक्तिले सैफमाथि आक्रमण गरे । घरका अर्का कर्मचारीमाथि पनि आक्रमण भएको नर्सले बताएकी छन् ।
उनका अनुसार, सैफले ती व्यक्तिलाई नियन्त्रणमा लिन सफल भएका थिए । त्यसपछि उनीहरू अर्को कोठामा गएर भित्रबाट ढोका बन्द गरे । घरका अन्य कर्मचारी आइपुग्दासम्म ती व्यक्ति मुख्य ढोकाबाट भागिसकेका थिए । आक्रमणमा गम्भीर घाइते भएका सैफलाई तत्काल अस्पताल लगिएको थियो ।
यसअघि मोजो स्टोरीसँगको कुराकानीमा सैफले आफूले भोगेको घटनाबारे बताएका थिए । चक्कु प्रहारबाट घाइते भएपछि आफूलाई ज्यान जान सक्ने डर लागेको उनले खुलाएका थिए ।
उनले भनेका थिए, ‘मैले सेतो कुर्ता–पाइजामा लगाएको थिएँ, जुन रगतले भिजेको थियो । एक समय म भुइँमा लडिरहेको थिएँ र मलाई अब म मर्न सक्छु जस्तो लाग्यो ।’
त्यतिबेला आफू छोरा तैमुरसँगै रहन चाहेको उनले बताए। अस्पताल जाने क्रममा तैमुरलाई पनि आफूसँग जान्छौ भनेर सोधेको सैफले सम्झिएका थिए ।
‘मैले उसलाई मसँग अस्पताल जान्छौ भनेर सोधेँ । उसले ‘तपाईं मर्न लाग्नुभएको हो ?’ भनेर सोध्यो । मैले होइन भनेँ र हामी सँगै अस्पताल गयौँ’ उनले भनेका थिए ।
घटना भएको तीन दिनपछि मुम्बई प्रहरीले मोहम्मद शरीफुललाई पक्राउ गरेको थियो । अदालतले उनले दोस्रोपटक गरेको अपराध स्वीकार गर्ने प्रयास अस्वीकार गरेपछि मुद्दाको सुनुवाइ अघि बढेको समाचारमा उल्लेख छ ।
अदालतमा नर्सले गरेको पहिचान र बयानमाथि अब मुद्दाको सुनुवाइका क्रममा परीक्षण गरिनेछ।
