क्रिकेटरबाट राजनीतिज्ञ बनेका ७४ वर्षीय खानले जेलबाटै लेखेको एक खुला पत्रमा पत्नी बुशरा बीबीको दृष्टि सधैँका लागि गुम्ने खतरा रहेको उल्लेख गर्दै चिन्ता व्यक्त गरेका छन्
इस्लामावाद — जेलजीवन बिताइरहेका पाकिस्तानका पूर्वप्रधानमन्त्री इमरान खानले देशको सर्वोच्च अदालतलाई आफू र आफ्नी पत्नी बुशरा बीबीको स्वास्थ अवस्था बिग्रदैं गएकाले चिकित्सा सहायता उपलब्ध गराउन अपिल गरेका छन् ।
उनले आफ्नो र पत्नी दुवैको स्वास्थ्य अवस्था नाजुक बन्दै गएको र आफू 'जिउँदो फर्कन नसक्ने' चेतावनीसमेत दिएका छन्। आफुले मानसिक तनाव झेलिरहेको पनि उनले लेखेका छन् ।
सोमबार सर्वोच्च अदालतलाई लेखेको पत्रमा खानले यस्तो लेखेका हुन् । क्रिकेटरबाट राजनीतिज्ञ बनेका ७४ वर्षीय खानले जेलबाटै लेखेको एक खुला पत्रमा पत्नी बुशरा बीबीको दृष्टि सधैँका लागि गुम्ने खतरा रहेको उल्लेख गर्दै चिन्ता व्यक्त गरेका छन्।
'७४ वर्षको उमेरमा यो कठोर अवस्थाले मलाई यस्तो मोडमा पुऱ्याएको छ जहाँबाट म जिउँदो फर्कन सक्दिनँ,' खानले आफ्नो पत्रमा लेखेका छन् ।उनले परिवारसँग भेटघाट गर्नका लागि चिकित्सक बोर्डले दिएको सिफारिसलाई समेत सरकारी अधिकारीहरुले बेवास्ता गरेको आरोप लगाएका छन्।
पत्रमा खानले भनेका छन्, 'मैले पूर्वप्रधानमन्त्री वा राजनीतिक दलको नेताको रूपमा मात्र यो कुरा लेखेको छैन । मैले आफ्नो जीवन पाकिस्तानलाई सुम्पिएको छ। मैले क्रिकेटको मैदानमा, समाजसेवा र परोपकारमा, र देशको २२ औँ प्रधानमन्त्रीको रूपमा यस राष्ट्रको सेवा गरेको छु। ७० वर्षको उमेरसम्म मेरो नाममा एउटा पनि फौजदारी मुद्दा थिएन। तर, ७० वर्षको उमेर कटेपछि राजनीतिक प्रतिशोधको अभूतपूर्व र निर्मम अभियान सुरु भयो । असङ्ख्य मुद्दाहरू, अदालतमा सयभन्दा बढी हाजिरी दमन सुरु भयो ।' उनले आफू र आफ्नो परिवारसँग मानवीय व्यवहार हुनुपर्ने माग राखेका छन् ।'
सन् २०१८ देखि २०२२ सम्म पाकिस्तानको सरकारको नेतृत्व गरेका खान भ्रष्टाचार, हिंसा भड्काउने, देशद्रोहलगायतका विभिन्न आरोपमा लामो समयदेखि जेल सजाय भोगिरहेका छन्। उनका समर्थकहरूले यी मुद्दाहरू राजनीतिक रूपले प्रेरित रहेको दाबी गर्दै आएका छन्।