भदौदेखि निरन्तर लक्ष्य पार गर्दै आएको कार्यालयले कात्तिकमा पनि अपेक्षाभन्दा बढी राजस्व उठाएर सुधारको गति कायम राखेको छ।
पर्सा — वीरगन्ज भन्सार कार्यालयले कात्तिक महिनामा पनि राजस्व असुलीको मासिक लक्ष्य पूरा गरेको छ।
भदौदेखि लगातार तीन महिना मासिक लक्ष्यभन्दा बढी राजस्व संकलन गरेको भन्सार कार्यालयको तथ्यांकले देखाएको छ। देशकै सर्वाधिक राजस्व संकलन गर्ने भन्सार कार्यालयका रूपमा रहेको वीरगन्ज भन्सारको मासिक तथा वार्षिक राजस्व असुलीसमेत उत्साहजनक देखिएको छ।
भन्सार कार्यालयको तथ्यांकअनुसार कात्तिक महिनामा राजस्व असुली लक्ष्यको एक सय दशमलव ८९ प्रतिशत संकलन भएको छ। भन्सार बिभागले यो कार्यालयलाई कात्तिक महिनाका लागि १७ अर्ब ६४ करोड रुपैयाँ लक्ष्य निर्धारण गरेकोमा कार्यालयले १७ अर्ब ७९ करोड राजश्व संकलन गरेको हो।
वीरगन्ज भन्सार कार्यालयले चालु आर्थिक वर्षको वार्षिक राजस्व संकलन लक्ष्यमा पनि उल्लेख्य योगदान गर्दै आएको छ। भन्सार विभागले चालु आर्थिक वर्षका लागि निर्धारित कुल राजस्व लक्ष्यको करिब ४६ दशमलव ८ प्रतिशत हिस्सा वीरगन्ज भन्सारलाई दिएको छ।
देशका प्रमुख व्यापारिक नाका तथा आयातको ठूलो हिस्सा यही नाकाबाट भित्रिने भएकाले राष्ट्रिय राजस्व संकलनमा वीरगन्ज भन्सारको योगदान महत्वपूर्ण रहँदै आएको छ।
कार्यालयको तथ्यांकअनुसार चालु आर्थिक वर्षमा वार्षिक लक्ष्यअनुसार राजस्व संकलनको प्रगति पनि उत्साहजनक देखिएको छ। कात्तिकसम्मको संकलनले वार्षिक लक्ष्यतर्फ सकारात्मक संकेत गरेको छ। यो भन्सार कार्यालयले चालु आर्थिक बर्षमा २ खर्ब ९४ करोड रुपैयाँ राजश्व असूलीको लक्ष्य पाएको छ । जस मध्ये करिब ३० प्रतिशत राजश्व संकलन भइसकेको छ ।
भदौ महिनादेखि राजस्व असुलीमा सुधार देखिएको वीरगन्ज भन्सारले असोज र कात्तिकमा समेत लक्ष्य हासिल गर्न सफल भएको छ। आयात व्यापारमा आएको सुधार, विभिन्न वस्तुको आयात बढ्नु तथा भन्सार प्रक्रियाबाट हुने राजस्व योगदानले असुलीमा सकारात्मक प्रभाव पारेको कार्यालयका प्रमुख भन्सार प्रशासक कृष्ण प्रसाद मैनाली बताउँछन् ।
वीरगन्ज भन्सारबाट पेट्रोलियम पदार्थ, औद्योगिक कच्चा पदार्थ, सवारीसाधन तथा पार्टपुर्जा, खाद्यान्न, फलाम तथा अन्य व्यापारिक वस्तुको आयात हुने गरेको छ। आयातमा आधारित राजस्व संरचनाका कारण व्यापारिक गतिविधि बढ्दा भन्सार राजस्वमा समेत वृद्धि हुने गरेको छ।
भदौदेखि लगातार तीन महिनासम्म मासिक लक्ष्य हासिल हुनु वीरगन्ज भन्सारको राजस्व संकलनमा सुधारको संकेत हो। यद्यपि वार्षिक लक्ष्य हासिल गर्न बाँकी महिनामा पनि यही गति कायम राख्नुपर्ने चुनौती कार्यालय सामु छ।
शंकर आचार्य कान्तिपुरका पर्सा संवाददाता हुन् ।