२६ कात्तिक, काठमाडौं । देशका विभिन्न तीन जिल्लाबाट अवैध लागूऔषधसहित पाँच जना पक्राउ परेका छन् ।
मोरङ, सुनसरी र बाँकेबाट लागूऔषधसहित ५ जना पक्राउ परेको नेपाल प्रहरीको केन्द्रीय समाचार कक्षले जनाएको छ ।
मोरङको पथरी शनिश्चरे नगरपालिका–४ बाट नियन्त्रित लागूऔषध ट्रामाडोल ७५ ट्याब्लेट र स्पास्पेन ७५ ट्याब्लेट सहित २ जनालाई बुधबार बेलुकी प्रहरीले पक्राउ गरेको हो ।
पक्राउ पर्नेहरूमा सोही ठाउँ बस्ने ४१ वर्षीय जयराम राई र उनकै श्रीमती २४ वर्षीया अस्मिता चौधरी रहेका छन् । अस्थायी प्रहरी पोष्ट किर्तिपुरबाट खटिएको प्रहरीले को.२० प ४७२३ नम्बरको स्कुटरमा सवार उनीहरूलाई उक्त लागूऔषध सहित फेला पारी पक्राउ गरेको हो ।
त्यस्तै, सुनसरीको बराहक्षेत्र नगरपालिका–७ बाङ्गेबाट अवैध लागूऔषध ब्राउनसुगर जस्तो देखिने पदार्थ १ ग्राम ८० मिलिग्राम सहित सोही नगरपालिका–७ सयपत्री टोल बस्ने ३० वर्षीय समुएल राईलाई बिहीबार दिउँसो प्रहरीले पक्राउ गरेको छ । अस्थायी प्रहरी चौकी बाङ्गेबाट खटिएको प्रहरीले उनलाई उक्त पदार्थ सहित पक्राउ गरेको हो ।
उता बाँकेको डुडुवा गाउँपालिका–२ बेतहनीबाट अवैध लागूऔषध गाँजा करिब ४ किलो १ सय ६० ग्राम सहित २ जनालाई बिहीबार बिहान प्रहरीले पक्राउ गरेको छ ।
पक्राउ पर्नेहरूमा नेपालगंज उपमहानगरपालिका–९ बस्ने ५२ वर्षीय धर्मेन्द्र गोडिया र २१ वर्षीय आकाश बाल्मिकी रहेका छन् । प्रहरी चौकी बेतहनीबाट खटिएको प्रहरीले बेतहनीबाट नेपालगंजतर्फ जाँदै गरेको ने.१ ह ३२१२ नम्बरको ई–रिक्सा जाँच गर्ने क्रममा उक्त गाँजा फेला पारी चालक धर्मेन्द्र र ई–रिक्सामा सवार आकाशलाई पक्राउ गरेको हो ।
