काठमाण्डौ । दसैंमा प्रदर्शनमा आएका तीन सिक्वेल फिल्मले पछिल्लो सात दिनमा संयुक्त रूपमा ६५ लाख ६२ हजार रुपैयाँभन्दा बढी ग्रस कमाइ थपेका छन् । त्यसमध्ये झन्डै ८६ प्रतिशत हिस्सा ‘आबाट आमा २’ एक्लैको छ । ‘छ माया छपक्कै २’ र ‘१२ गाउँ २’ को साताभरिको संयुक्त कमाइ भने १० लाख रुपैयाँभन्दा कम छ ।
चलचित्र विकास बोर्डले सोमबार सार्वजनिक गरेको कात्तिक २२ गते आइतबारसम्मको बक्स अफिस विवरणअनुसार तीन फिल्मको कुल ग्रस कमाइ १२ करोड ५४ लाख ७४ हजार २९ रुपैयाँ पुगेको छ । यी फिल्मका कुल ४ लाख १९ हजार ४९१ टिकट बिक्री भएका छन् । अघिल्लो साताको विवरणमा संयुक्त कमाइ ११ करोड ८९ लाख १२ हजार रुपैयाँभन्दा बढी थियो ।
चन्द्र पन्त निर्देशित ‘आबाट आमा २’ ले सात दिनमा ५६ लाख ३७ हजार रुपैयाँभन्दा बढी थप्दै कुल ग्रस कमाइ ६ करोड ८१ लाख ७ हजार ४१३ रुपैयाँ पुर्याएको छ । तीन फिल्ममध्ये सबैभन्दा धेरै २ लाख ३७ हजार ३०७ टिकट यही फिल्मका बिक्री भएका छन् । पल शाह, विपना थापा, मलिका महत र आकाश श्रेष्ठ अभिनीत यो फिल्मको पहिलो भाग ‘आबाट आमा’ ले १३ करोड २० लाख रुपैयाँ ग्रस कमाएको थियो ।
‘छ माया छपक्कै २’ ले सातामा थप्यो साढे सात लाख हाराहारी
दीपेन्द्र लामा निर्देशित ‘छ माया छपक्कै २’ ले पछिल्लो साता ७ लाख ४१ हजार रुपैयाँभन्दा बढी ग्रस कमाइ थपेको छ । १ लाख ६ हजार ६४४ टिकट बिक्री गरेको फिल्मको कुल ग्रस कमाइ ३ करोड ४२ लाख २५ हजार ९४५ रुपैयाँ पुगेको छ । दीपकराज गिरी, केकी अधिकारी, सनिशा भट्टराई र दीपाश्री निरौलालगायतको अभिनय रहेको फिल्मको पहिलो भागले ९ करोड ९२ लाख रुपैयाँ ग्रस कमाएको थियो ।
‘१२ गाउँ २’ को साप्ताहिक कमाइ दुई लाखमुनि
विराज भट्ट निर्देशित ‘१२ गाउँ २’ ले सात दिनमा १ लाख ८२ हजार रुपैयाँभन्दा बढी ग्रस कमाइ थपेको छ । ७५ हजार ५४० टिकट बिक्रीबाट फिल्मको कुल ग्रस कमाइ २ करोड ३१ लाख ४० हजार ६७१ रुपैयाँ पुगेको छ । विराज भट्ट, समीर भट्ट र अनुपविक्रम शाहीलगायत अभिनीत यो फिल्मको पहिलो भाग ‘१२ गाउँ’ ले १९ करोड ९२ लाख रुपैयाँ ग्रस कमाएको थियो ।
पहिलो भागको कुल कमाइसँग अहिलेको आँकडा तुलना गर्दा सबैभन्दा ठूलो अन्तर ‘१२ गाउँ २’ मा देखिन्छ । यसको हालसम्मको ग्रस कमाइ पहिलो भागको करिब १२ प्रतिशत छ । ‘छ माया छपक्कै २’ पहिलो भागको करिब ३५ प्रतिशतमा पुगेको छ भने ‘आबाट आमा २’ ले पहिलो भागको कमाइको आधा नाघेको छ ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।
