आर्सनलको लगातार पाँचौँ जित, म्यानचेस्टर सिटी हार्दा शीर्ष स्थानमा ६ अंकको अग्रता

इङ्लिस प्रिमियर लिगमा आर्सनलले हल सिटीलाई पराजित गर्दै शीर्ष स्थानमा ६ अंकको अग्रता बनाएको छ। उपाधि होडको प्रमुख प्रतिद्वन्द्वी म्यानचेस्टर सिटी नटिङ्घम फरेस्टसँग पराजित भएपछि आर्सनललाई थप राहत मिलेको हो।

शनिबार इमिरेट्स स्टेडियममा भएको खेलमा आर्सनलले हल सिटीलाई १–० गोलले हरायो। आर्सनलका कप्तान मार्टिन ओडेगार्डले खेलको ७२औँ मिनेटमा गरेको गोल निर्णायक बन्यो। नोनी माडुएकेको प्रहार हलका गोलकिपर कोन्स्टान्टिनोस जोलाकिसले बचाएपछि फर्किएको बललाई ओडेगार्डले जाली चुमाएका थिए।

खेलको अन्त्यतिर आर्सनलले अग्रता दोब्बर पार्ने अवसर पाए पनि सफल हुन सकेन। माडुएकेको प्रहार गोलकिपर जोलाकिसले रोकेपछि बल हलका नोबेल मेन्डीलाई लागेर फर्किएको थियो। तर, ब्रुक नोर्टन–कफीले गोललाइनबाट बल क्लियर गर्दै आर्सनलको अर्को गोल रोके।

पहिलो हाफमै आर्सनलले गोलका केही अवसर सिर्जना गरेको थियो। डेक्लान राइसको हेडर गोलकिपरले सहजै बचाएका थिए भने दोस्रो हाफमा माडुएकेको प्रहार पनि सफल हुन सकेन।

पहिलो हाफमा काई हाभर्ट्जलाई पेनाल्टी क्षेत्रमा मेन्डीले जर्सी तानेर लडाएपछि आर्सनलले पेनाल्टीको माग गरेको थियो। भिडियो असिस्टेन्ट रेफ्री (भीएआर)को सुझावमा रेफ्री फाराई हालमले भिडियो समीक्षा गरे पनि हाभर्ट्ज अफसाइड अवस्थामा रहेकाले पेनाल्टी दिएनन्।

यस जितसँगै आर्सनलले लिगमा लगातार पाँचौँ जित निकालेको छ। सेप्टेम्बरमा ब्राइटनसँग ३–० गोलले पराजित भएयता टोलीले लिगमा अंक गुमाएको छैन। उक्त हार नै यस सिजन आर्सनलले भोगेको अहिलेसम्मको एकमात्र हार हो।

आर्सनलले सबै प्रतियोगितामा घरेलु मैदानमा अपराजित यात्रा ११ खेलसम्म पुर्‍याएको छ। तीमध्ये टोलीले नौ खेलमा जित निकालेको छ।

उता, उपाधि दौडमा आर्सनलको प्रमुख प्रतिस्पर्धी म्यानचेस्टर सिटी भने नटिङ्घम फरेस्टसँग ३–१ गोलले पराजित भएको छ। सिटीको हार र आफ्नो जितसँगै आर्सनलले लिगको शीर्ष स्थानमा ६ अंकको अग्रता बनाएको छ।

प्रकाशित: २२ कार्तिक २०८३ ०९:४२ आइतबार