.jpeg)
नेपाल प्रिमियर लिग (एनपीएल) क्रिकेटको तेस्रो संस्करणमा अहिलेसम्मका खेलले प्रतियोगितालाई थप प्रतिस्पर्धात्मक र रोमाञ्चक बनाएका छन्। उपाधि रक्षा गर्ने लक्ष्यसहित मैदानमा उत्रिएको लुम्बिनी लायन्सले पहिलो हार बेहोरेको छ भने सुरुवाती खेलमा पराजित भएको काठमाडौं गोर्खाज लगातार तीन जित निकाल्दै उपाधिको दाबेदारका रूपमा देखिन थालेको छ।
प्रतियोगिताको १८औँ खेल शनिबार सम्पन्न भएसँगै आज (आइतबार) एक दिन विश्राम दिइएको छ। कात्तिक १० गतेदेखि सुरु भएको प्रतियोगितामा अहिलेसम्मका खेलले कुनै पनि टोलीको उपाधि यात्रा सहज नरहेको देखाएका छन्। केही टोलीले निरन्तरता कायम राखेका छन् भने केहीका लागि सुरुवाती प्रदर्शन अपेक्षाअनुसार हुन सकेको छैन।
शनिबारको खेलमा काठमाडौं गोर्खाजले साविक विजेता लुम्बिनी लायन्सलाई ३६ रनले पराजित गर्दै प्रतियोगितामा आफ्नो तेस्रो जित दर्ता गर्यो। काठमाडौंले निर्धारित २० ओभरमा ८ विकेट गुमाएर १६० रन बनाएको थियो। जवाफमा लुम्बिनी १९.३ ओभरमा १२४ रनमै समेटियो।
काठमाडौंको जितमा अस्ट्रेलियाली ब्याटर डेभिड वार्नरले ५० बलमा ६६ रन बनाए। साहिल पटेलसँग उनले पहिलो विकेटका लागि १०४ रनको साझेदारी गरे। वार्नरले ९ चौका र एक छक्का प्रहार गरे। बलिङतर्फ जाहन्दाद खानले २३ रन खर्चेर चार विकेट लिए। कप्तान करण केसीले पनि दुई विकेट झारे।
लुम्बिनीका लागि सन्दीप जोराले सर्वाधिक ४४ रन बनाए पनि अन्य ब्याटरले साथ दिन सकेनन्। लुम्बिनीले पावरप्लेमै ६ विकेट गुमाएर २८ रन बनाएको थियो। यही खराब सुरुवात टोलीको हारको मुख्य कारण बन्यो।
यस जितसँगै काठमाडौंले प्रतियोगितामा लगातार तेस्रो सफलता हात पारेको छ। पहिलो खेलमा जनकपुर बोल्ट्ससँग पराजित भएको काठमाडौंले त्यसपछि कर्णाली याक्स, विराटनगर किंग्स र लुम्बिनीविरुद्धको खेलमा प्रभावशाली प्रदर्शन गरेको छ। लुम्बिनीमाथिको जितले उसको आत्मविश्वास थप बढाएको छ।
लुम्बिनीका लागि भने यो हार विशेष अर्थमा महत्वपूर्ण बनेको छ। अघिल्लो संस्करणको अन्तिम चरणका लगातार जितसहित यस सिजनका सुरुवाती खेलमा पनि अपराजित रहेको लुम्बिनीको ११ खेल लामो अपराजित यात्रा काठमाडौंले टुङ्ग्याएको हो। हारका बाबजुद लुम्बिनी सात अङ्कसहित तालिकाको शीर्ष स्थानमा छ।
अहिलेसम्मको प्रदर्शन हेर्दा काठमाडौं गोर्खाज र सुदूरपश्चिम रोयल्स उपाधि दौडमा बलियो देखिएका छन्। दुवैले समान ६ अङ्क जोडेका छन्। रनरेटका आधारमा काठमाडौं दोस्रो र सुदूरपश्चिम तेस्रो स्थानमा छन्। पाँच अङ्कसहित चितवन राइनोज पनि प्रतिस्पर्धामा छ। जनकपुर बोल्ट्स, कर्णाली याक्स र विराटनगर किंग्सले चार–चार अङ्क जोडेका छन्। पोखरा एभेन्जर्स भने अहिलेसम्म जितको खोजीमा छ।
प्रतियोगिताको सुरुवातमै लुम्बिनीले सुदूरपश्चिमलाई सात विकेटले पराजित गर्दै आफ्नो उपाधि रक्षा अभियान सुरु गरेको थियो। चितवन राइनोज र विराटनगर किंग्सबीचको खेलमा चितवन आठ रनले विजयी भएको थियो। कर्णाली याक्सले जनकपुर बोल्ट्सलाई एक विकेटले पराजित गर्दा सुदूरपश्चिमले पोखरालाई ६ विकेटले हराएको थियो। जनकपुरले काठमाडौंलाई आठ विकेटले हराएर आफ्नो शक्ति देखाएको थियो।
त्यसपछि कर्णालीले विराटनगरलाई चार विकेटले हराउँदा विराटनगरले वर्षाले प्रभावित पाँच ओभरको खेलमा सुदूरपश्चिमलाई ३५ रनले पराजित गरेको थियो। जनकपुरले पोखरालाई नौ रनले हराएको थियो भने काठमाडौंले कर्णालीलाई चार विकेटले पराजित गरेको थियो। सुदूरपश्चिमले चितवनलाई पाँच विकेटले हराउँदा विराटनगरले जनकपुरमाथि दुई रनको रोमाञ्चक जित निकालेको थियो।
लुम्बिनीले पोखरालाई आठ विकेटले र जनकपुरलाई १६ रनले पराजित गर्दै आफ्नो प्रभाव कायम राखेको थियो। काठमाडौंले विराटनगरलाई नौ विकेटले हराएको खेल पनि प्रतियोगिताको उल्लेखनीय प्रदर्शनमध्ये एक रह्यो। पछिल्ला खेलमा सुदूरपश्चिमले कर्णालीलाई ३९ रनले र चितवनले पोखरालाई ३० रनले हराएका थिए। यसरी प्रतियोगितामा ब्याटिङ र बलिङ दुवै पक्षबाट विभिन्न टोलीले आफ्नो क्षमता देखाएका छन्।
प्रतियोगितामा व्यक्तिगत प्रदर्शन पनि उत्तिकै चर्चामा छ। डेभिड वार्नरको ब्याटिङ, जाहन्दाद खानको प्रभावशाली बलिङ, नेपाली खेलाडीहरूको निर्णायक योगदान र विदेशी खेलाडीको उपस्थितिले एनपीएललाई प्रतिस्पर्धात्मक बनाएका छन्। विशेषगरी नेपाली खेलाडीले दबाबपूर्ण अवस्थामा देखाएको प्रदर्शनले घरेलु क्रिकेटको क्षमता र सम्भावनालाई उजागर गरेको छ।
यस संस्करणको अर्को महत्वपूर्ण पक्ष निर्णय समीक्षा प्रणाली (डीआरएस) को प्रयोग हो। नेपाली क्रिकेटमा पहिलोपटक एनपीएलमार्फत डीआरएस प्रयोग हुनु प्रतियोगिताको प्राविधिक विकासका दृष्टिले महत्वपूर्ण उपलब्धि बनेको छ। अन्तर्राष्ट्रिय क्रिकेट परिषद् (आईसीसी) को मान्यताअनुसार प्रतियोगिताका खेललाई लिस्ट ए टी–२० संरचनामा समेटिनुले पनि यसको प्रतिष्ठा बढाएको छ।
सामाजिक सञ्जालमा पनि एनपीएलका खेललाई लिएर क्रिकेटप्रेमीहरूले विभिन्न प्रतिक्रिया दिइरहेका छन्। काठमाडौंको लगातार तेस्रो जित, वार्नरको ब्याटिङ र जाहन्दादको घातक बलिङले प्रशंसा पाएको छ। अर्कोतर्फ पोखराको लगातारको हार, बलियो मानिएका टोलीका ब्याटरहरूको कमजोर प्रदर्शन र लुम्बिनीको पछिल्लो हारले समर्थकबीच चर्चा बढाएको छ। खेलका नतिजा र व्यक्तिगत प्रदर्शनबारे फेसबुक तथा एक्समा सार्वजनिक भएका प्रतिक्रियाले पनि प्रतियोगिताप्रति दर्शकको चासो निरन्तर रहेको देखाउँछन्।
एनपीएलको यस संस्करणमा दर्शकको उपस्थिति, प्रत्यक्ष प्रसारण र सामाजिक सञ्जालमा हुने चर्चाले नेपाली क्रिकेटको व्यावसायिक सम्भावनासमेत देखाएको छ। यद्यपि प्रतियोगिताको लोकप्रियता बढ्दै जाँदा खेलमैदानको पूर्वाधार, दर्शक व्यवस्थापन, खेलको समयपालना र वर्षाका कारण खेल प्रभावित हुने अवस्थाको व्यवस्थापनमा पनि उत्तिकै ध्यान दिनुपर्ने देखिन्छ।
आजको विश्रामपछि प्रतियोगिता सोमबारदेखि पुनः सुरु हुनेछ। सोमबार दिउँसो १२:३० बजे पोखरा एभेन्जर्स र कर्णाली याक्सबीच प्रतिस्पर्धा हुनेछ भने साँझ ५ बजे चितवन राइनोज र काठमाडौं गोर्खाज आमनेसामने हुनेछन्। लगातार तीन जित निकालेको काठमाडौं आफ्नो लय कायम राख्ने लक्ष्यमा हुनेछ भने पोखरा पहिलो जितको खोजीमा मैदान उत्रनेछ।
प्रतियोगितामा अझै लिग चरणका खेल बाँकी रहेकाले अहिले नै कुनै टोलीको उपाधि सम्भावना कमजोर वा बलियो भनेर निष्कर्ष निकाल्न हतार हुनेछ। शीर्ष स्थानमा रहेको लुम्बिनीले पुनरागमन गर्नुपर्नेछ भने काठमाडौं र सुदूरपश्चिमले आफ्नो लय कायम राख्नुपर्नेछ। चितवन, जनकपुर, कर्णाली र विराटनगरका लागि पनि आगामी खेल निर्णायक बन्न सक्छन्।
समग्रमा, एनपीएलको तेस्रो संस्करणले नेपाली क्रिकेटमा प्रतिस्पर्धा, अन्तर्राष्ट्रिय खेलाडीको आकर्षण र घरेलु प्रतिभाको सम्भावना एकसाथ प्रस्तुत गरिरहेको छ। आजको विश्रामपछि सुरु हुने खेलले अंकतालिकाको समीकरण मात्र होइन, उपाधि दौडको दिशा पनि थप स्पष्ट पार्ने अपेक्षा गरिएको छ।
प्रकाशित: २२ कार्तिक २०८३ ०८:४४ आइतबार
