इनम सापकोटाको अडियोमाथि अनुसन्धान होस् : थापा

बिहीबार एक भिडियो सन्देश जारी गर्दै उनले इनम सापकोटाको भनिएको अडियोको सत्यताका विषयमा निष्पक्ष अनुसन्धानका लागि पनि माग गरेका छन् ।

काठमाडौँ — कांग्रेस सभापति गगन थापाले पार्टीको आधिकारिकता लिन लेनदेनको ‘डिल’ गरेको आरोपको प्रतिवाद गरेका छन् । बिहीबार एक भिडियो सन्देश जारी गर्दै उनले इनम सापकोटाको भनिएको अडियोको सत्यताका विषयमा निष्पक्ष अनुसन्धानका लागि पनि माग गरेका छन् ।

थापाले पार्टीको आधिकारिता लिने सवालमा अनुचित लेनदेन नभएको बताएका छन् । ‘पार्टीको आधिकारीकता लिने सवालमा राजनीतिक र कानुनी लडाइँमा रुपैयाँको होइन, एक सुकाको पनि आर्थिक लेनदेन र अनुचित काम भएको छैन,’ उनले भनेका छन्, ‘इनम सापकोटाको अडियो भनेर बजारमा आएको भनिएका आधारमा हामीले सार्वजनिक रूपमा उत्तर दिनै नपर्ने हो । तर यो पछि अब सक्कियो । अब प्रश्न हामीलाई होइन, जहाँ सोध्नुपर्ने हो, त्यहाँ सोध्ने हो । यो प्रेसको पनि जिम्मा हो । अरू चासो राख्नेहरूको पनि जिम्मा हो ।’

थापाले प्रतिपक्षको आवाज बन्द गराउन यस्ता हल्ला सरकारी पक्षबाटै बाहिर ल्याइएको आशयसहितको अभिव्यक्ति दिएका छन् । ‘लोकतान्त्रिक अधिकारलाई खुम्च्याउँदै गर्दा, संस्थाहरूलाई कमजोर बनाउँदै गर्दा हामी मूकदर्शक भएर बस्दैनौं, प्रतिवाद गर्छौं । यो हाम्रो ड्युटी हो । हामीले जब प्रश्न उठायौं, त्यसपछि नै यस्ता हल्लाहरू बाहिर आए । के यसले हाम्रो प्रश्न गर्ने कुरा बन्द हुन्छ ? हुँदैन । गलत कुराको प्रतिवाद गर्ने र प्रश्न गर्ने कुरा बन्द हुँदैन,’ उनले भनेका छन् ।

आफ्नो सबैभन्दा बलियो पक्ष भनेकै नैतिक बल रहेको र यसैका कारण विगतमा पनि आफू बाँचेर आएको उनको भनाइ छ । ‘यस्ता लडाइँमा म किन बाँचेको छु भने म नैतिक रूपमा बलियो छु, ढलिनँ । बाँचेर आएँ । किनकि म सफा छु, स्वच्छ छु । म ठीक ठाउँमा उभिएको छु । ढुक्क रहनुहोस्,’ उनले भने, ‘गगन थापा कुनै कमजोर नैतिक धरातलमा उभिएको छैन । तपाईं मेराबारेमा जिम्मा लिएर बोल्न सक्नुहुन्छ, भन्न सक्नुहुन्छ । गगन थापाबाट कुनै गलत, अनैतिक काम भएको छैन, हुन सक्दैन ।’

थापाले प्रायोजित हल्लाका बीच पनि प्रश्नहरू मर्न नदिने दृढता व्यक्त गरे । ‘प्रश्नहरू मरे प्रजातन्त्र सकिन्छ । हाम्रो प्रगति पनि सकिन्छ । आजको मूल प्रश्न भनेकै के हामी प्रश्नलाई बचाउन सक्छौं भन्ने हो । सबैको ध्यान यसैमा जाओस्,’ भिडियो सन्देशमा उनले भनेका छन् ।

कुलचन्द्र कान्तिपुर मिडिया ग्रुपका राजनीतिक संवाददाता हुन् । उनी राजनीतिक दल, संसदीय मामिलासँग सम्बन्धित बिषयमा रिपोर्टिङ/टिप्पणी लेख्छन् ।