सातै प्रदेशबाट छनोट भएका १०० जना सहभागीले नेतृत्व विकास, साझा समस्या पहिचान र निर्णय प्रक्रियामा सहभागिताका प्राथमिकता तय गर्नेछन्।
पोखरा — दृष्टिविहीन तथा न्यून दृष्टिविहीन युवा र महिलाका सवाल उजागर गर्दै उनीहरूको नेतृत्व विकास र निर्णय प्रक्रियामा सहभागिता बढाउने उद्देश्यले पोखरामा पहिलोपल्ट राष्ट्रिय भेला आयोजना भएको छ ।
नेपाल नेत्रहीन संघले बिहीबार पोखरामा राष्ट्रिय युवा तथा महिला भेला आयोजना गरेको हो । भेलामा सातै प्रदेशबाट छनोट भएका एक सयजना सहभागी छन् । तीमध्ये १८ देखि २९ वर्ष उमेर समूहका ६२ जना युवा र ३० वर्षमाथिका ३८ जना महिला छन् ।
भेलाका स्थानीय आयोजक समिति संयोजक लक्ष्मण सुवेदीले दृष्टिविहीन युवा र महिलाका मुद्दा उनीहरू आफैंले उठाउने र नेतृत्व गर्ने वातावरण बनाउन भेला आयोजना गरिएको बताए । ‘यो कार्यक्रम दृष्टिविहीन युवा र महिलाका सवालमा संघको प्रतिबद्धता र उनीहरूको नेतृत्व विकासका लागि गरिएको प्रयास हो,’ उनले भने, ‘उनीहरूका आवाजलाई समाज र राज्यको निर्णय प्रक्रियासम्म पुर्याउन यो भेलाले महत्त्वपूर्ण भूमिका खेल्नेछ ।’
भेला स्थानीय आयोजक समिति सदस्य सचिव खोमराज शर्माले भेलाबाट दृष्टिविहीन युवा र महिलाका साझा समस्या पहिचान गरी कार्यान्वयन गर्न सकिने प्राथमिकता तय गरिने बताए । ‘सहभागीले आफैं आफ्ना सवाल र प्राथमिकता निर्धारण गर्नेछन् । भेलाले तय गरेका विषयलाई कार्यआह्वानका रूपमा अघि बढाउँदै त्यसको कार्यान्वयनका लागि छुट्टाछुट्टै समिति बनाइनेछ,’ उनले भने ।
उद्घाटनपछि महिला र युवाका छुट्टाछुट्टै समानान्तर सत्र सञ्चालन हुनेछन् । महिला सत्रमा हिंसामुक्त र सुरक्षित जीवन, आर्थिक स्वतन्त्रता र मर्यादित जीवन तथा नेतृत्व र निर्णय प्रक्रियामा दृष्टिविहीन महिलाको सहभागिताका विषयमा छलफल हुनेछ । युवा सत्रमा आत्मनिर्भर र स्वाभिमानी युवा, स्वस्थ युवा र कुशल नेतृत्व तथा डिजिटल रूपान्तरण र कृत्रिम बुद्धिमत्ताले सिर्जना गरेका अवसरबारे छलफल गरिनेछ ।
दुवै समूहका सहभागीले आ–आफ्ना पाँच–पाँच प्राथमिकता तय गर्नेछन् । भेलाले ‘पोखरा कार्यआह्वान’ पारित गर्नुका साथै नौ सदस्यीय महिला समिति र नौ सदस्यीय युवा समिति गठन गर्नेछ । गठित समितिले संघको सहयोगमा एक वर्षसम्म भेलाले निर्धारण गरेका प्राथमिकताका क्षेत्रमा काम गर्नेछन् । समितिका सदस्यका लागि २० देखि २२ कात्तिकसम्म नेतृत्व विकास, पैरवी तथा प्रभावकारी सञ्चारसम्बन्धी तालिमसमेत सञ्चालन गरिनेछ ।
भेलास्थलमा साँझ ५ बजेसम्म मोबाइल तथा ल्यापटप क्लिनिक र सहायक प्रविधि प्रदर्शन गरिने आयोजकले जनाएको छ । सहभागीलाई मोबाइल तथा ल्यापटपमा स्क्रिन रिडर र पहुँचयुक्तता सेटिङ मिलाउन सहयोग गरिनेछ । दृष्टिविहीन सहभागीको सहजताका लागि भेलाका सम्पूर्ण सामग्री ब्रेल, ठूलो अक्षर, अडियो र पहुँचयुक्त डिजिटल ढाँचामा उपलब्ध गराइनेछ । अपांगता भएका व्यक्तिको अधिकारसम्बन्धी संयुक्त राष्ट्रसंघीय महासन्धिका विभिन्न व्यवस्थाअनुरूप आयोजना गरिएको भेला डेनिस एसोसिएसन अफ द ब्लाइन्ड र करुणा फाउन्डेसन नेपालको सहयोगमा राइज कार्यक्रमअन्तर्गत सञ्चालन गरिएको हो ।
दीपक परियार कान्तिपुरका पोखरा संवाददाता हुन् ।
