संयुक्त राष्ट्रसंघीय बाल कोष (युनिसेफ) ले नेपालका करिब ९९ लाख बालबालिका अस्वस्थकर वायु प्रदूषणको जोखिममा रहेको बताएको छ ।
काठमाडौँ — संयुक्त राष्ट्रसंघीय बाल कोष (युनिसेफ) ले नेपालका करिब ९९ लाख बालबालिका अस्वस्थकर वायु प्रदूषणको जोखिममा रहेको बताएको छ । युनिसेफले सार्वजनिक गरेको नयाँ प्रतिवेदनअनुसार जलवायु परिवर्तन, वातावरणीय प्रदूषण र विपद्का कारण नेपालका लाखौं बालबालिकाको स्वास्थ्य, पोषण, शिक्षा र सुरक्षामा गम्भीर असर परिरहेको देखिएको छ । प्रतिवेदनले नेपालका बालबालिका बढ्दो जलवायु संकटको प्रत्यक्ष जोखिममा रहेको औंल्याएको हो ।
प्रतिवेदनअनुसार नेपालका ७३ लाख बालबालिका खडेरी र ५७ लाख बालबालिका अत्यधिक गर्मीको जोखिममा छन् । त्यस्तै, २९ लाख बालबालिका वर्षाजन्य पहिरोको जोखिममा रहेको प्रतिवेदनमा उल्लेख छ । करिब २४ लाख बालबालिका एकैपटक विभिन्न उच्च तीव्रताका जलवायुजन्य विपद्को सामना गरिरहेको युनिसेफले जनाएको छ।
जलवायु संकटले खानेपानी, कृषि उत्पादन, पोषण र बालबालिकाको पठनपाठनमा समेत प्रतिकूल असर पारिरहेको प्रतिवेदनमा उल्लेख छ । प्रतिवेदनका अनुसार नेपालमा हाल ४७ दशमलव ५ प्रतिशत जनसंख्याको मात्र सुरक्षित खानेपानीमा पहुँच छ ।
युनिसेफ नेपालकी प्रतिनिधि एलिस अकुंगाले जलवायु संकट क्रमशः बालअधिकार संकटका रूपमा परिणत हुँदै गएको बताएकी छन् । उनले जलवायु परिवर्तनमा बालबालिकाको योगदान नगण्य भए पनि यसको सबैभन्दा गम्भीर असर उनीहरुले भोगिरहेको बताएकी छन् ।
यसैबीच, युनिसेफले जलवायु नीति, बजेट, अनुकूलन योजना तथा विपद् जोखिम न्यूनीकरणका कार्यक्रममा बालबालिकाका आवश्यकता र अधिकारलाई प्राथमिकता दिन सरकारसँग आग्रह गरेको छ।
युनिसेफले आगामी कोप–३१ जलवायु सम्मेलनको सन्दर्भमा बालबालिका तथा युवाको सहभागिता सुनिश्चित गर्दै जलवायु संकटसँग जुध्ने प्रयासमा उनीहरूलाई केन्द्रमा राख्न आग्रह गरेको छ।
