नेपाल प्रिमियर लिग (एनपीएल) अन्तर्गत १ सय ८१ रनको लक्ष्य पछ्याइरहेको काठमाडौं गोर्खाजले १० ओभरको समाप्तिमा २ विकेट गुमाएर ७४ रन बनाएको छ।
सुरुवाती झट्कापछि सम्हालिने प्रयास गरिरहेको काठमाडौंमाथि अब प्रतिओभर ११ भन्दा बढीको रनरेटको दबाब बढेको छ।
काठमाडौंलाई जितका लागि अब ५८ बलमा १ सय ७ रन आवश्यक छ। हाल क्रिजमा मोहम्मद आदिल आलम २६ बलमा २० रन र रसिद खान १४ बलमा २२ रन बनाएर खेलिरहेका छन्। यी दुई ब्याटरले पछिल्लो पाँच ओभरमा बिनाकुनै क्षति ३६ रन जोड्दै इनिङ्स उकास्ने प्रयास गरेका छन्।
यसअघि लक्ष्य पछ्याउने क्रममा काठमाडौंले दुवै ओपनरलाई सस्तैमा गुमाएको थियो। आक्रामक सुरुवात गरेका डेभिड वार्नर १६ रन बनाएर सोमपाल कामीको बलमा बोल्ड भए। लगत्तै स्मित पटेल ९ रनको व्यक्तिगत स्कोरमा नन्दन यादवको बलमा बोल्ड भएपछि काठमाडौं ४.१ ओभरमा २८/२ को संकटपूर्ण अवस्थामा पुगेको थियो।
कर्णालीका लागि कप्तान सोमपाल कामी र नन्दन यादवले १-१ विकेट लिएका छन्। यसअघि कीर्तिपुरस्थित मैदानमा टस हारेर पहिले ब्याटिङ गरेको कर्णाली याक्सले निर्धारित २० ओभरमा ६ विकेट गुमाएर १ सय ८० रनको बलियो योगफल तयार पारेको थियो।
कर्णालीका लागि अरिफुल इस्लामले ४४ र हुसेन तलतले ४० रन बनाएका थिए भने काठमाडौंका कप्तान करण केसीले २ विकेट हात पारेका थिए।
प्रकाशित: १६ कार्तिक २०८३ १५:३१ सोमबार
