अमेरिकामा रहेका नेपालीलगायत विभिन्न समुदायबाट संकलित रकम फाउन्डेसनले प्रधानमन्त्री राहत कोषमा जम्मा गरेको हो ।
लस एन्जलस, अमेरिका — अमेरिकाको दक्षिणी क्यालिफोर्नियामा सक्रिय श्री पशुपतिनाथ फाउन्डेसनले भोटेकोशी बाढीपीडितका लागि १ करोड ४८ लाख रुपैयाँ प्रधानमन्त्री राहत कोषमा जम्मा गरेको छ ।
फाउन्डेसनका अध्यक्ष बिमल श्रेष्ठका अनुसार अमेरिकामा रहेका नेपालीलगायत विभिन्न समुदायबाट ९९ हजार ६४ अमेरिकी डलर (१ करोड ५१ लाख नेपाली रुपैयाँ) संकलन गरिएको थियो । बैंक शुल्क कटाएर ९७ हजार ८ सय ७५ अमेरिकी डलर (१ करोड ४८ लाख रुपैयाँ) राहत कोषमा पठाइएको उनले जानकारी दिए ।
फाउन्डेसनले नेपाली राजदूतावास वासिङ्टन डीसीसँगको भर्चुअल कार्यक्रममा सहयोग रकम पठाइएको घोषणा गरेको हो ।
सहयोग अभियानमा दक्षिणी क्यालिफोर्नियामा क्रियाशील विभिन्न संघसंस्था, नेपाली समुदाय तथा अन्य समुदायका उदारमनाहरूको उल्लेखनीय योगदान रहेको फाउन्डेसनले जनाएको छ ।
प्रवासमा रहेर पनि मातृभूमिमा परेको विपद्लाई आफ्नै पीडा सम्झँदै सहयोग गर्नु नेपालीहरूको देशप्रेम, मानवीय संवेदना र सामाजिक उत्तरदायित्वको उदाहरण भएको फाउन्डेसनले जनाएको छ।
फाउन्डेसनले यसअघि पनि नेपालमा गएको भूकम्पका बेला राहत तथा सहयोगका कार्यक्रम सञ्चालन गरेको थियो।
.png)
