रुसले यसअघि घरेलु बजारलाई ध्यानमा राखेर डिजेलको निर्यातमा कडाई गरेको थियो । तर, अमेरिकासँगको नयाँ सम्झौतापछि उद्योगहरुलाई निर्यातका लागि निश्चित कोटा तोकिएको छ
मस्को — अमेरिकी सरकारसँग भएको आपूर्ति सम्झौतापछि रुसी कम्पनीहरुले डिजेल उत्पादनलाई वृद्धि गरेका छन् । दुई औद्योगिक स्रोतलाई उद्धृत गर्दै रोयटर्सले यस विषयको खुलासा गरेको हो ।
रुसले यसअघि घरेलु बजारलाई ध्यानमा राखेर डिजेलको निर्यातमा कडाई गरेको थियो । तर, अमेरिकामा बेच्न पाउने भएपछि उद्योगहरुलाई निर्यातका लागि निश्चित कोटा तोकिएको छ ।
अमेरिकी राष्ट्रपति डोनाल्ड ट्रम्पले अक्टोबर ९ मा रुसबाट अमेरिका तथा विश्व बजारमा डिजेल आपूर्ति हुने बताएका थिए ।
अमेरिकाले त्यसअघि लगाएको रुसमाथिको इन्धन प्रतिबन्धलाई अस्थायी रुपमा हटाइएको घोषणा उनले गरेका थिए । रुसले यस सहमतिको पुष्टि गर्दै अमेरिकी बजारका लागि आवश्यक इन्धन आपुर्ति गर्ने बताएका थियो ।
ट्रम्पका अनुसार रुसले ३ लाख मेट्रिक टन (करिब २२ लाख ५० हजार ब्यारेल) डिजेल तत्काल उपलब्ध गराउनेछ । त्यसपछि नोभेम्बरमा थप ५ लाख टन र लगत्तै १० लाख टन डिजेल अमेरिकामा आपूर्ति गरिनेछ । रिफाइनरीको अवस्था हेरेर रुसले भविष्यमा थप ३० लाख टन इन्धन दिन सक्ने ट्रम्पको भनाइ छ ।
रुसको औद्योगिक स्रोतका अनुसार रुसमा डिजेल उत्पादन सेप्टेम्बरमा प्रतिदिन १ लाख ७५ हजार टन रहेकोमा अक्टोबरको पहिलो आधामा घटेर प्रतिदिन १ लाख ६० हजार टनमा सीमित भएको थियो । तर, नयाँ सम्झौतासँगै अक्टोबरको मध्यतिर उत्पादन पुनः बढेर प्रतिदिन १ लाख ८० हजार टन पुगेको छ ।
खाद्यान्न बाली भित्र्याउने सिजन समाप्ती र मौसमी कारणले अक्टुबरमा रुसको घरेलु बजारमा डिजेलको खपत कम हुने गर्छ । त्यहीकारण, यस महिनाका सुरुवाती दिनमा उत्पादन सेप्टेम्बरको दाँजोमा घटेको थियो । तर अमेरिका र अन्य देशहरुमा निर्यात गर्न पाइने भएपछि उत्पादन फेरि बढाइएको छ ।
घरेलु बजारमा सेप्टेम्बरको दाँजोमा अक्टोबरमा इन्धन खपत कम हुने भएकाले रुसले प्रतिदिन कम्तिमा ४० हजार टन डिजेल बचत गर्नसक्छ । जसकारण, महिनाको १० लाख टनसम्म डिजेल भण्डारण हुनेछ । त्यसमध्ये करिब २ देखि ३ लाख टन छिमेकी मुलुकहरु तथा बाँकी अमेरिका निर्यात गर्ने रुसको योजना छ ।
इन्धन सम्बन्धी तथ्याङ्क विश्लेषण गर्ने कम्पनी एलएसइजीको रिपोर्टअनुसार ४० हजार टन रुसी डिजेल बोकेर न्युयोर्कतर्फ लागेको माल्टाको ध्वाजावाहक ट्याङ्कर अक्टोबर २३ मा ट्रयाकिङ प्रणालीमा देखिएको छ । सोही दिन क्रेमलिनका प्रवक्ता दिमित्री पेस्कोभले पहिलो ट्याङ्कर प्रस्थान गरेसँगै अमेरिकातर्फ रुसी डिजेलको आपूर्ति नियमित रूपमा जारी रहने बताएका छन् ।
