बलिउड अभिनेता ऋतिक रोशन र सुजैन खान कुनै समय फिल्म उद्योगका चर्चित जोडीमध्ये पर्थे । सन् २००० मा विवाह गरेका उनीहरूले करिब १४ वर्षपछि सम्बन्धविच्छेद गरे । अहिले दुवै आ–आफ्नो जीवनमा अघि बढिसकेका छन् । ऋतिक अभिनेत्री सबा आजादसँग प्रेम सम्बन्धमा छन् भने सुजैन अभिनेता अर्सलान गोनीसँग सम्बन्धमा छिन् ।
सम्बन्धविच्छेद भएको वर्षौँपछि सुजैनले आफ्नो वर्तमान सम्बन्ध र पूर्वपति ऋतिकसँगको सम्बन्धबारे खुलेर कुरा गरेकी छन् । उनले अर्सलानले आफ्नो जीवनमा प्रेम र साथको कमी पूरा गरेको बताएकी छन् । सुजैनका अनुसार अर्सलान उनको जीवनमा आएपछि उनले प्रेम र साथको नयाँ अनुभूति गरेकी छन् । उनले अर्सलानलाई असल व्यक्ति भन्दै आफ्नो जीवनमा उनको उपस्थितिप्रति खुसी व्यक्त गरेकी छन् ।
त्यस्तै, उनले पूर्वपति ऋतिक र उनकी प्रेमिका सबा आजादसँगको सम्बन्धबारे पनि आफ्नो धारणा राखेकी छन् । सम्बन्धविच्छेदपछि पनि ऋतिक र सुजैनले आफ्ना दुई छोरा हृदान र हृरेहानको संयुक्त अभिभावकत्व निर्वाह गर्दै आएका छन् ।
दुवैले नयाँ सम्बन्ध अघि बढाए पनि छोराहरूको खुसी र परिवारबीचको आपसी समझदारीलाई महत्त्व दिँदै आएका छन् । ऋतिक र सुजैन अहिले पनि मित्रवत् सम्बन्धमा छन् । उनीहरू आफ्ना नयाँ साथीहरूसँग समेत विभिन्न कार्यक्रममा सहभागी हुने गरेका छन् ।
