भारतको उत्तर प्रदेशको राजधानी लखनउस्थित नौबस्ता क्षेत्रमा जग्गासम्बन्धी विवादलाई लिएर सोमबार दिउँसै गोली चल्दा बाबुछोरासहित एकै परिवारका तीन जनाको मृत्यु भएको छ। घटनामा भारतीय नौसेनामा कार्यरत एक जवानमाथि गोली चलाएको आरोप लागेको छ।
भारतीय सञ्चारमाध्यमका अनुसार सआदतगन्ज क्षेत्रको नौबस्तामा बरगदको रूखमुनि रहेको चबुतरा (चौतारा) को विषयलाई लिएर दुई पक्षबीच लामो समयदेखि विवाद चल्दै आएको थियो। सोमबार उक्त विवाद चर्किएपछि गोली चलेको बताइएको छ।
गोली प्रहारबाट सुयश तिवारी र उनका बुबाको मृत्यु भएको छ। सुयशका काका शम्भु तिवारी पनि गोली लागेर गम्भीर घाइते भएका थिए। उनलाई उपचारका लागि अस्पताल लगिएको थियो। तर, उपचारकै क्रममा उनको पनि मृत्यु भएको जनाइएको छ।
घटनामा एकै परिवारका तीन जनाको ज्यान गएपछि परिवारमा शोक छाएको छ। दिउँसै गोली चलेपछि स्थानीय क्षेत्रमा त्रास फैलिएको थियो।
घटनामा भारतीय नौसेनामा कार्यरत एक जवानमाथि गोली चलाएको आरोप लागेको छ। यद्यपि, घटनामा उनको संलग्नता र विवादको वास्तविक कारणबारे प्रहरीले अनुसन्धान गरिरहेको छ।
गोली चलेपछि घटनास्थलमा प्रहरी टोली पुगेको थियो। घटनाको गम्भीरतालाई ध्यानमा राख्दै वरिष्ठ प्रहरी अधिकारी तथा आसपासका प्रहरी कार्यालयका टोलीसमेत परिचालन गरिएको जनाइएको छ।
प्रहरीले घटनास्थलको निरीक्षण गरी अनुसन्धान अघि बढाएको छ। मृतकका शव पोस्टमार्टमका लागि पठाइएको छ भने घटनामा संलग्न आरोपितहरूको खोजी भइरहेको छ।
जग्गासम्बन्धी विवादका कारण भएको भनिएको यस घटनाबारे प्रहरीले थप अनुसन्धान गरिरहेको छ।
प्रकाशित: ९ कार्तिक २०८३ १४:२० सोमबार
